विदर्भाच्या प्रशिक्षपदी वसिम जाफर

विदर्भ क्रिकेट संघाच्या प्रशिक्षकपदी अनुभवी फलंदाज वसिम जाफरची नियुक्ती होऊ शकते, अशी माहिती सूत्रांनी दिली आहे.


चंद्रकांत पंडीत यांनी विदर्भ क्रिकेट संघटनेचे प्रशिक्षकपद सोडले आहेत. जाफर हा विदर्भाच्या संघाचा महत्वाचा भाग आहे. पण जाफर हा ७ मार्चला निवृत्त होत आहे. त्यामुळे आता पंडित यांच्या जागी विदर्भ संघाचा प्रशिक्षकपदी जाफरची नियुक्ती होऊ शकते, असे म्हटले जात आहे.

पंडीत हे प्रशिक्षकपदी असताना विदर्भाच्या संघाने सलग दोनदा रणजी करंडक स्पर्धा जिंकत इतिहास रचला होता. यंदाच्या रणजी स्पर्धेच्या अंतिम फेरीत मात्र त्यांना पोहोचता आले नाही. पंडीत यांनी विदर्भाच्या संघाला सोडचिठ्ठी दिली आहे. आता ते मध्य प्रदेशच्या संघाचे प्रशिक्षकपद सांभाळणार आहेत.

क्रिकेटमधून फलंदाज म्हणून निवृत्ती पत्करल्यानंतर मला प्रशिक्षकपद भूषवण्याची इच्छा आहे, असे जाफरने काही दिवसांपूर्वी म्हटले होते. आता त्याची ही इच्छा पूर्ण होताना दिसत आहे.

विदर्भ क्रिकेट संघटनेचे अध्यक्ष अतुल जैस्वाल यांनी याबाबत सांगितले की, " विदर्भ संघाच्या नव्या प्रशिक्षकाबाबत आमची कोणतीही चर्चा झालेली नाही, त्याचबरोबर याबाबतीत कोणताही निर्णय घेण्यात आलेला नाही. याबाबत आम्ही लवकरच निर्णय घेणार आहोत. त्यामुळे काही दिवसांतच विदर्भ संघाचे नवे प्रशिक्षक कोण असतील, याची माहिती तुम्हाला मिळेल." जैस्वाल यांनी ही माहिती आयएएनएस या वृत्तसंस्थेला दिली आहे.

आयएएनएस या वृत्तसंस्थेने जाफरशीही संपर्क साधला. याबाबत जाफर म्हणाला की, " याबाबत माझ्याशी कोणीही संपर्क साधलेला नाही. जर माझ्याशी याबाबत संपर्क साधला तर त्यांना मी माझे मत नक्कीच कळवेन."