हेजलवूडला रिप्लेस करणारा मायकल नेसर नेमका आहे तरी कोण? IPL मध्ये या संघातून खेळला पहिला सामना

लंडन: ७ जूनपासून भारत आणि ऑस्ट्रेलिया यांच्यात वर्ल्ड टेस्ट चॅम्पियनशिप २०२३ चा अंतिम सामना लंडनमधील ओव्हल मैदानावर खेळवला जाणार आहे. मात्र, या मोठ्या सामन्यापूर्वी ऑस्ट्रेलियन संघाला मोठा धक्का बसला आहे. संघाचा अनुभवी वेगवान गोलंदाज जोश हेझलवूड वेळेत फिट होऊ शकला नाही त्यामुळे तो आता WTC फायनलसाठी ऑस्ट्रेलियन संघाबाहेर झाला आहे. अशा परिस्थितीत ऑस्ट्रेलियाने त्याच्या जागी मध्यमगती गोलंदाज मायकेल नेसरचा समावेश केला आहे. अखेर, ऑस्ट्रेलिया संघात आलेला हा नेसर नेमका आहे तरी कोण? जाणून घेऊया.

मायकेल नेसर कोण आहे?

३३ वर्षीय गोलंदाजी अष्टपैलू मायकेल नेसर हा दक्षिण आफ्रिकन वंशाचा खेळाडू आहे. डिसेंबर २०२२ मध्ये त्याने ऑस्ट्रेलियासाठी शेवटचा सामना वेस्ट इंडिजविरुद्ध खेळला होता. अशा परिस्थितीत त्याचा आता पुन्हा एकदा संघात समावेश करण्यात आला आहे. पण यावेळची परिस्थिती थोडी वेगळी आहे. नेसरने आत्तापर्यंत ऑस्ट्रेलियासाठी फक्त २ कसोटी आणि २ एकदिवसीय सामने खेळले आहेत.

मायकेलने कसोटीत १६.७१ च्या सरासरीने आणि ४०.१४ च्या स्ट्राईक रेटने ७ विकेट घेतल्या आहेत. त्याच वेळी, एकदिवसीय सामन्यांमध्ये, त्याने खेळलेल्या २ कसोटींमध्ये ७.२ च्या इकॉनॉमीसह गोलंदाजी करत २ विकेट घेतले आहेत. जर आपण नसेरच्या देशांतर्गत कारकिर्दीबद्दल बोललो तर त्याने ९६ प्रथम श्रेणी सामन्यांमध्ये ३४७ विकेट घेतल्या आहेत. यादरम्यान त्याची सरासरी २३.५ इतकी होती. एवढेच नाही तर मायकलने २६.७८ च्या सरासरीने ३०८० धावा केल्या आहेत.

नेसरआयपीएलमध्येही खेळला आहे

मायकेल नेसरने २०१३ मध्ये आयपीएलमध्ये पदार्पण केले. त्याला २०१३ मध्ये पंजाब किंग्जने करारबद्ध केले होते. विशेष म्हणजे त्या मोसमात नेसर फक्त एकच सामना खेळू शकला होता. त्याने रॉयल चॅलेंजर्स बंगळुरूविरुद्ध पदार्पण केले होते. त्या सामन्यात त्याला जोरदार फटका बसला तो म्हणजे त्याच्या चार षटकात ६४ धावा केल्या होत्या.


हा त्याचा पहिला आणि शेवटचा आयपीएल सामना ठरला. त्यानंतर त्याला आयपीएलमध्ये खेळण्याची संधी मिळाली नाही. त्याच वेळी, नेसर ऑस्ट्रेलियाच्या प्रसिद्ध बिग बॅश लीगचा देखील भाग आहे. तथापि, भारताविरुद्धच्या WTC फायनलमध्ये खेळणे त्याला थोडे कठीण जात आहे कारण ऑस्ट्रेलिया तिसरा वेगवान गोलंदाज म्हणून स्कॉट बोलंडला पसंती देऊ शकतो.