महेला जयवर्धनेने का नाकारलं भारतीय संघाचे प्रशिक्षकपद, जाणून घ्या खरं कारण...

नवी दिल्ली : मुंबई इंडियन्सचा मुख्य प्रशिक्षक महेला जयवर्धनेला (Mahela Jayawardene) रवी शास्त्री यांच्यानंतर भारतीय संघाच्या प्रशिक्षकपदासाठी विचारणा करण्यात आली होती. पण जयवर्धनेने भारताचे प्रशिक्षकपद नाकारण्यास नकार दिला. जयवर्धनेने हा मोठा निर्णय का घेतला, याचं खरं कारण आता समोर आलं आहे.

बीसीसीआयच्या नियमानुसार जर एखादी व्यक्ती आयपीएलमध्ये एका पदावर असेल तर ती बीसीसीआय किंवा भारतीय संघासाठी काम करू शकत नाही. सध्याच्या घडीला जयवर्धने मुंबई इंडियन्सचा मुख्य प्रशिक्षक आहे. त्याचबरोबर मुंबई इंडियन्सचा संघ चांगल्या फॉर्मात आहे. पण भारतीय संघाचे प्रशिक्षक स्विकारले तर जयवर्धनेला मुंबई इंडियन्सची साथ सोडावी लागेल. त्यामुळे जयवर्धनेने भारतीय संघाच्या प्रशिक्षकपदाला नकार दिल्याचे दिसत आहे. आपल्याला श्रीलंकेच्या राष्ट्रीय संघाचे प्रशिक्षकपद भुषवायचे आहे, असे जयवर्धनेने बीसीसीआयला सांगितले आहे. पण हे यामागचे खरं कारण नसल्याचं दिसत आहे. कारण सध्याच्या घडीला मुंबई इंडियन्सकडून मोठी रक्कम जयवर्धनेला मिळत आहे, ही रक्कम किती आहे हे कोणालाच माहिती नाही. पण भारतीय संघाचे प्रशिक्षकपद स्विकारल्यावर जयवर्धनेला किती रक्कम मिळते, हे सर्वांना समजू शकते. त्याचबरोबर मुंबई इंडियन्स हे एक कुटुंब असल्याचे आतापर्यंत सर्वांनी पाहिले आहे. त्यामुळे सहजासहजी मुंबई इंडियन्सची साथ कोणीही सोडून जात नसल्याचे पाहायला मिळाले आहे. त्यामुळेदेखील जयवर्धनेने भारतीय संघाच्या प्रशिक्षकपदाला नकार दिला असेल. त्याचबरोबर जयवर्धनेने जर श्रीलंकेच्या संघाचे प्रशिक्षकपद सांभाळले तर तो मुंबई इंडियन्समध्येही कार्यरत राहू शकतो. त्यामुळे जयवर्धनेने श्रीलंकेच्या राष्ट्रीय संघाला पसंती देण्याचे ठरवले असेल.

बीसीसीआय सध्याच्या घडीला परदेशी प्रशिक्षक शोधण्याच्या तयारीत आहे. त्यामुळे त्यांनी मुंबई इंडियन्सला विक्रमी जेतेपदं मिळवून देणाऱ्या जयवर्धनेला भारतीय संघाच्या प्रशिक्षकपदाबाबत विचारणा केली होती. पण जयवर्धनेने भारताच्या प्रशिक्षकपदाला नकार दिला आहे. याबाबतचे मोठे कारण आता समोर आले आहे. त्यामुळे आता बीसीसीआय भारतीय संघाच्या प्रशिक्षकपदासाठी अजून कोणाला विचारणा करणार, याची उत्सुकता आता सर्वांनाच लागलेली असेल.