बंदी असूनही मैदानात एका प्रेक्षकाची उपस्थिती

करोना व्हायरसमुळे आता काही स्पर्धा रद्द करण्यात आल्या आहेत, तर काही पुढे ढकलण्यात आल्या आहेत. पण ज्या स्पर्धा सध्याच्या घडीला सुरु आहेत त्या प्रेक्षकांविना चालू ठेवण्यात आल्या आहेत. सध्या ऑस्ट्रेलिया आणि न्यूझीलंड यांच्यामध्ये मालिका सुरु आहे. या मालिकेतील एक सामना सिडनी येथे सुरु आहे. या सामन्यासाठी तिकीट विक्री करण्यात आली नव्हती. कारण करोना व्हायरसमुळे एकाही प्रेक्षकाला स्टेडियममध्ये येऊ दिले नाही. पण तरीही एक प्रेक्षक स्टेडियममध्ये उपस्थित असल्याचे पाहायला मिळाले. एका तपापासून हा प्रेक्षक या स्टेडियममध्ये आहे. तो एकटाच प्रेक्षक सध्याच्या घडीला या सामन्याचा साक्षीदार ठरत असल्याचे म्हटले जात आहे.

आज ऑस्ट्रेलिया आणि न्यूझीलंड यांच्यामधील सामन्यात एकच प्रेक्षक पाहायला मिळाला. याबाबत माहिती काढल्यावर त्याचे नाव स्टीफन हेराल्ड गॅस्कोजीन असल्याचे समजते. या प्रेक्षकाला चाहते प्रेमाने 'याबा' म्हणत असल्याचेही समजत आहे. पण या प्रेक्षकाला स्टेडियममध्ये एंट्री कशी दिली आणि तो आहे तरी कोण, याबाबत चर्चेला सुरुवात झाली आहे.

'याबा' हा एवढा प्रसिद्ध का आहे, असा प्रश्न आता तुम्हाला पडला असेल. कोणताही सामना सुरु असताना 'याबा' तो पाहण्यासाठी यायचा. त्याचबरोबर तो खेळाडूंवर मजेशीर कमेंट करायचा. त्यामुळे तो अजूनही चाहत्यांच्या लक्षात आहे. 'याबा'चा जन्म १८७८ साली झाला होता. आता 'याबा' या जगात नाही. पण तरीही या दर्दी क्रिकेट चाहत्याची आठवण सिडनी क्रिकेट ग्राऊंडने ठेवली आहे. त्यांना 'याबा'चा एक पुतळा बनवला आहे आणि २००८ साली त्यांनी हा पुतळा एका स्टँडमध्ये बसवला आहे. त्यामुळे हा पुतळा नसून एखादी व्यक्तीच सामना पाहत आहे, असा भास बऱ्याच जणांना होतो.


'याबा'ने भारताचे माजी कर्णधार मन्सूर अली खान पतौडी यांच्यावर देखील एकदा मजेशीर कमेंट केली होती. १९३२ साली भारताचा संघ ऑस्ट्रेलियाच्या दौऱ्यावर गेला होता. यावेळी सिडनीमध्ये एका कसोटी सामन्यात पतौडी फलंदाजी करत होते. पतौडी हे बरेच चेंडू खेळले, पण त्यांनी एकही धाव काढली नव्हती. तेव्हा 'याबा' यांनी मजेशीर कमेंट करत, पतौडी यांच्या खिशामध्ये कोणीतरी पैसे ठेवा, असे म्हटले होते.