तू माझा सुपरस्टार!; युवराजला गांगुलीचे उत्तर

नवी दिल्ली: भारतीय क्रिकेट संघाचा माजी कर्णधार सौरव गांगुलीची बीसीसीआयच्या अध्यक्षपदी निवड निश्चित मानली जात आहे. सध्या विविध स्तरांतून गांगुलीवर शुभेच्छांचा वर्षाव होत आहे. भारताचा माजी स्फोटक फलंदाज युवराज सिंग यानंही गांगुलीचं कौतुक केलं. त्याचवेळी त्यानं 'योयो' चाचणीचा उल्लेख करत आपलं दुःखही गांगुलीसमोर व्यक्त केलं. त्यावर तू तर माझा सुपरस्टार आहेस, असं उत्तर गांगुलीनं दिलं.

युवराज सिंगनं ट्विट करून सौरव गांगुलीला शुभेच्छा दिल्या. त्या ट्विटमध्ये त्यानं 'योयो' चाचणीचा मुद्दा उपस्थित करत मनातील खंत बोलून दाखवली. व्यक्ती जितकी महान असते, त्याचा प्रवासही तितकाच महान असतो. भारतीय कर्णधार ते बीसीसीआय अध्यक्षापर्यंत! योयो चाचणीची मागणी केली जात होती तेव्हा तुम्ही बीसीसीआय अध्यक्ष असायला हवे होतात. गु़ लक दादी!, असं युवराजनं ट्विटमध्ये म्हटलं आहे. त्यावर गांगुलीनंही युवराजचे आभार मानले. तू भारताला विश्वविजेतेपद जिंकून दिले. आता क्रिकेटसाठी आणखी चांगलं काही करण्याची वेळ आली आहे. तू तर आमचा सुपरस्टार आहेस, असं गांगुली म्हणाला.



दरम्यान, २०१७मध्ये योयो चाचणीत यशस्वी होऊनही युवराज सिंगला संघात स्थान देण्यात आलं नाही. त्यानंतर तो कधीच संघात परतला नाही. २०१९मध्ये त्यानं निवृत्तीची घोषणा केली. त्यावेळी युवराजनं नाराजी व्यक्त केली होती. चांगल्या कामगिरीनंतरही मला घरी बसावे लागेल याचा विचारही केला नव्हता. ३६व्या वर्षी मी योयो चाचणीची तयारी केली आणि त्यात यशस्वीही झालो. त्यानंतरही मला स्थानिक क्रिकेट सामन्यांमध्ये खेळण्यास सांगितले, अशी खंत त्यानं बोलून दाखवली होती.

सौरव गांगुलीचा मैदानाबाहेरही षटकार; बीसीसीआयचा 'बॉस' होणार

याआधीही हजरजबाबी असलेल्या गांगुलीनं कोलकात्यात माध्यमांच्या प्रतिनिधींना रवी शास्त्रींबद्दल विचारलेल्या प्रश्नावर मजेशीर उत्तर दिलं होतं. बीसीसीआयच्या अध्यक्षपदी गांगुलीची निवड निश्चित मानली जात असताना, कोलकात्यात एका पत्रकारानं 'रवी शास्त्री यांच्याशी तू बोललास का?' असा खोचक प्रश्न विचारला. त्यावर गांगुलीने नेहमीच्या खास शैलीत उत्तर दिले. आता त्यांनी असे काय केले आहे? असं गांगुली म्हणाला.

सौरव गांगुली रवी शास्त्रींबाबत 'असे' बोलल्यानंतर क्रिकेटविश्वात रंगली चर्चा