विजय 'आउट'; धवन 'इन'

मटा ऑनलाइन वृत्त । नवी दिल्ली

सलामीवर मुरली विजयला मनगटाच्या दुखापतीमुळे श्रीलंकेविरुद्धच्या आगामी कसोटी मालिकेतून माघार घ्यावी लागली आहे. विजयच्या जागी डावखुरा सलामीवीर शिखर धवनची संघात वर्णी लावण्यात आली आहे.

भारत आणि श्रीलंका यांच्यात तीन कसोटी सामने खेळले जाणार असून यात विजयच्या जागी धवनचा समावेश निवड समितीकडून करण्यात आला आहे, असे बीसीसीआयचे सचिव अमिताभ चौधरी यांनी एका प्रसिद्धीपत्रकाद्वारे स्पष्ट केले.

ऑस्ट्रेलिया दौऱ्यात विजयच्या मनगटाला दुखापत झाली होती. या दुखपतीतून तो पूर्णपणे बरा झालेला नाही, असे बीसीसीआयच्या मेडिकल टीमच्या पाहणीत स्पष्ट झाल्याने त्याला श्रीलंका दौऱ्यातून वगळण्याचा निर्णय घेण्यात आला.

दरम्यान, वन-डे टीममध्ये धवन खोऱ्याने धावा काढत असला तरी कसोटीत मात्र त्याला सातत्य राखता आलेलं नाही. आतापर्यंत २३ कसोटी सामन्यांत ३८.५२ च्या सरासरीने त्याने १४६४ धावा केल्या आहेत. त्यात चार शतकांचा समावेश आहे. २०१६मध्ये धवन न्यूझीलंडविरुद्ध कसोटी सामना खेळला होता. त्यानंतर वर्षभराने तो आता लंकेविरोधात मैदानात उतरणार आहे. तीन सामन्यांच्या मालिकेतील पहिला कसोटी सामना २६ जुलैपासून खेळवला जाणार आहे.