बेंगळुरूः भारतीय क्रिकेट संघाचा कर्णधार विराट कोहली हा शुक्रवारी घेण्यात आलेल्या 'यो-यो' फिटनेस चाचणीत सहज उत्तीर्ण झाला. त्यामुळे, आयर्लंडविरुद्धच्या आगामी दोन सामन्यांच्या टी-२० क्रिकेट मालिकेत त्याचा सहभाग निश्चित झाला आहे. त्याचवेळी मधल्या फळीतील फलंदाज अम्बटी रायुडू याला मात्र या चाचणीतील आवश्यक निकष पूर्ण करण्यात अपयशी ठरला. त्यामुळे त्याला संघातून वगळण्यात येण्याची शक्यता आहे.
इंग्लंड-आयर्लंड दौऱ्यावर जाणाऱ्या मर्यादित षटकांच्या भारतीय संघातील खेळाडूंची शुक्रवारी राष्ट्रीय क्रिकेट अकादमीमध्ये (एनसीए) यो-यो चाचणी घेण्यात आली. या चाचणीमध्ये विराटसह धोनी, भुवनेश्वरकुमार, रैना, बुमराह, सिद्धार्थ कौल, वॉशिंग्टन सुंदर, चहल, मनीष पांडे, अम्बटी रायुडू हे खेळाडू सहभागी झाले होते. विराटसह भारतीय संघातील जवळपास सर्वच खेळाडूंनी शुक्रवारी घेण्यात आलेली यो-यो चाचणी यशस्वीरीत्या पूर्ण केली. रायुडू हा एकमेव खेळाडू या चाचणीत अपयशी ठरला. या चाचणीत उत्तीर्ण होण्यासाठी १६.१ गुणांचा निकष ठेवण्यात आला होता. ही चाचणी पूर्ण करता न आल्यामुळे रायुडूला संघातून वगळण्यात येईल, अशी माहिती बीसीसीआयच्या वरिष्ठ अधिकाऱ्याने दिली. यंदाच्या आयपीएल मोसमात रायुडूने केलेल्या प्रभावी कामगिरीच्या जोरावर त्याची सुमारे दीड वर्षानंतर भारतीय वनडे संघात निवड करण्यात आली होती.
दरम्यान, मागील वर्षी या चाचणीत अपयशी ठरलेल्या सुरेश रैनाने यावेळी सहजरीत्या ही चाचणी पार केली. भारत आणि आयर्लंड यांच्यामध्ये २७ आणि २९ जून रोजी दोन टी-२० सामने होणार असून ३ जुलैपासून भारताच्या इंग्लंड दौऱ्यास सुरुवात होणार आहे. या दौऱ्यात भारत तीन टी-२०, तीन वनडे आणि पाच कसोटी क्रिकेट सामने खेळेल.