एकाच लढतीत विराट, एबीच्या विकेट

वृत्तसंस्था, जयपूर

राजस्थान रॉयल्सचा स्पिनर श्रेयस गोपाळ याला आकाश ठेंगणे झाले आहे. त्याने राजस्थानला आयपीएल लढतीत विजय मिळवून देण्यात महत्त्वाची भूमिका बजावलीच; पण प्रतिस्पर्धी रॉयल चॅलेंजर्स बेंगळुरू संघाचे विराट कोहली आणि एबी डीव्हिलियर्स हे हुकमी फलंदाज बाद करण्यात यश मिळवले. एकाच लढतीत एबी आणि विराट यांच्यासारख्या फलंदाजांना बाद करण्यात यश आल्याने हा लेगस्पिनर सुखावला आहे. त्याने आपल्या चार षटकांत १२ धावांत ३ मोहरे टिपले आहेत. ज्यामुळे राजस्थानने बेंगळुरूवर सात विकेट राखून विजय मिळवला.

'विराट कोहली, डीव्हिलियर्ससारख्या फलंदाजांना बाद करणे हे कुठल्याही होतकरू गोलंदाजाचे स्वप्नच असते. माझ्या आतापर्यंतच्या क्रिकेट कारकिर्दीतील हा सर्वोत्तम क्षण आहे. तर आयपीएल कारकिर्दीतील सर्वोच्च कामगिरी', लढत पार पडल्यानंतर पत्रकारांशी संवाद साधताना श्रेयस गोपाळला काय बोलावे अन् काय नको, असे झालेले असते. अर्थात त्याचे उत्तर एवढ्यावरच मर्यादित नसते. 'गोलंदाजासाठी प्रत्येक विकेट महत्त्वाची असते; पण विराट आणि एबी ही मोठी नावे आहेत. अशा बड्या फलंदाजांना पॅव्हेलियनमध्ये धाडणे गोलंदाजांना नक्कीच मोठे समाधान देणारे असते. मात्र हे यश डोक्यात जाणार नाही, याची खबरदारी घेतो आहे. त्यासाठी मनशांत ठेवायचे आहे', असे उत्तर २५ वर्षांचा श्रेयस गोपाळ देतो.

विराट कोहली आणि डीव्हिलियर्ससारख्या फलंदाजांसाठी सापळे रचायचे काम महाकठीण असल्याचे श्रेयस मान्य करतो. 'आपला सर्वोत्तम मारा करायचा, टप्प्यात अचूकता राखायची, अशी खबरदारी घेतली तरच डीव्हिलियर्स, विराटसारख्या फलंदाजांची विकेट मिळते. तसेच अशा मोठ्या विकेट मिळवण्यासाठी परिस्थितीदेखील तशी असावी लागते', असे गोपाळ म्हणाला. हा स्पिनर 'गृहपाठ' करुनच मैदानात उतरतो. मैदान (आउटफील्ड) कसे आहे हे तो बघतो. विकेटचा अंदाज घेण्याचा प्रयत्न करतो. प्रतिस्पर्ध्यांबाबतही गोपाळ सजग असतो.