एव्हरेस्टवीर हर्षद राव ‘कांचनजंगा’साठी सज्ज

मोहिमेसाठी मदतीचे आवाहन

म. टा. प्रतिनिधी, पुणे

पुण्याचा एव्हरेस्टवीर हर्षद राव १ एप्रिलला 'माउंट कांचनजंगा' मोहिमेसाठी रवाना होणार आहे. हर्षदने 'माउंट एव्हरेस्ट'वर २०१६मध्ये यशस्वी चढाई केली होती. आता त्याने जगातील तिसरे सर्वांत उंचीचे शिखर कांचनजंगा (८५८६ मीटर) सर करण्याचा निर्धार केला आहे. यासाठी त्याला आर्थिक मदतीची गरज असून, पुणेकरांना त्याने मदतीचे आवाहन केले आहे.

या ६० दिवसांच्या वैयक्तिक मोहिमेसाठी हर्षदला २० लाख रुपये खर्च येणार आहे. दोन वर्षांपूर्वी त्याने प्रतिकूल परिस्थितीत एव्हरेस्टवर यशस्वी चढाई करून आपल्यातील कौशल्य दाखवून दिले. त्या मोहिमेत त्याला २५ ते ३० लाख रुपये खर्च आला होता. आता या नव्या मोहिमेसंदर्भात हर्षद राव म्हणाला, 'गेल्या वर्षभरापासून मी या मोहिमेची तयारी करीत आहे. शारीरिक आणि मानसिक तयारीसोबतच मला पैशांचीही तरतूद करावी लागत आहे. तो माझ्यासाठी आणखी एक एव्हरेस्ट आहे. मागील मोहिमेत मला पुणेकरांनी चांगली मदत केली होती. त्या जोरावर मी एव्हरेस्टवर यशस्वी चढाई करू शकलो. या वेळी मला नऊ लाख रुपये कमी पडत आहे. ही मदत मिळाली, तर कांचनजंगा मोहीम मी नक्कीच यशस्वी करून दाखवणार.' हर्षद या मोहिमेसाठी 'लाइव्ह लोकेशन ट्रॅकिंग' सॉफ्टवेअरचा उपयोग करणार आहे. ज्यामुळे या मोहिमेदरम्यान तो कुठे आहे, हे कळू शकणार आहे. असा प्रयोग भारतात प्रथमच करण्यात येणार असल्याचा दावाही हर्षदने केला आहे. एव्हरेस्टपूर्वी हर्षदने सह्याद्रीतील ढाक-बहिरी, तैलाबैला, खडा पार्सी, नकटा, ड्युकनोज, वजीर; तसेच गंगोत्रीजवळील जोगीण १ व ३, उत्तराखंडमधील जॉनली हे शिखर सर केले आहे. त्याने गिर्यारोहणाचे तांत्रिक शिक्षण उत्तरकाशी येथील 'नेहरू इन्स्टिट्यूट ऑफ माउंटनीअरिंग'मधून घेतले असून, दार्जिलिंग येथील 'हिमालय इन्स्टिट्यूट ऑफ माउंटनीअरिंग'मधूनही त्याने प्रशिक्षण घेतले आहे. हर्षदला मदत करण्यासाठी ९०११०७८४१८ या क्रमांकावर संपर्क करावा.