प्रत्येक व्यवसायात हितसंबंध येतात : कुंबळे

पणजी : '

प्रत्येक व्यवसायात हितसंबंध येतात. अशा स्थितीत तुम्ही ते कसे हाताळतात, हे महत्त्वाचे आहे,' असे मत भारतीय संघाचे माजी प्रशिक्षक आणि माजी कर्णधार अनिल कुंबळे यांनी व्यक्त केले.

भारताचा माजी कर्णधार राहुल द्रविडला हितसंबंधांच्या मुद्द्यावरून भारतीय क्रिकेट नियामक मंडळाच्या (बीसीसीआय) आतरसंहिता अधिकारी डी. के. जैन यांनी नोटीस पाठवली आहे. मध्य प्रदेश क्रिकेटचे संजय गुप्ता यांनी केलेल्या तक्रारीवरून जैन यांनी द्रविडला नोटीस पाठवली आहे. याबाबत आपले मत स्पष्ट करताना कुंबळे म्हणाले, 'मला वाटते आयुष्यातील प्रत्येक व्यवसायात हितसंबंध असतात. मात्र, तुम्ही त्यांचा सामना कसा करतात, त्याची कल्पना आधी कशी देतात, हे जास्त महत्त्वाचे आहे. जेव्हा लोकांना कळते की तुम्ही आधीच अमक्या एका गोष्टीशी जुळला आहात, तर मला नाही वाटते त्यात हितसंबंधांचा मुद्दा येत असेल.'

द्रविडची नुकतीच राष्ट्रीय क्रिकेट अॅकॅडमीच्या अध्यक्षपदी निवड करण्यात आली आहे. त्याचबरोबर द्रविड हा इंडिया सिमेंट ग्रुपचा उपाध्यक्षही आहे. या ग्रुपकडे आयपीएलमध्ये चेन्नई सुपर किंग्ज संघाची मालकी आहे. भारताकडून खेळलेले फारच थोडे असे क्रिकेटपटू आहेत, जे पुन्हा या खेळात आपले योगदान देतात आणि हे दुर्दैवी असल्याचेही कुंबळे यांनी सांगितले.