Ball Tampering:ऑस्ट्रेलियाची चापलूसी यानं पकडली!

नवी दिल्ली:

दक्षिण आफ्रिकेविरुद्धच्या तिसऱ्या कसोटी सामन्यादरम्यान ऑस्ट्रेलियाच्या खेळाडूंनी चेंडूशी छेडछाड केल्याचं समोर आलं. क्रिकेटसारख्या 'जंटलमन्स'च्या खेळाला काळीमा फासणारा हा प्रकार कोणी उघडकीस आणला हे ठाऊक आहे का? फॅनी डीव्हिलियर्स असं या दक्षिण आफ्रिकेच्या माजी खेळाडूचं नाव आहे. समालोचन करताना त्यांनी ही बाब एका कॅमेरामनच्या लक्षात आणून दिली आणि ऑस्ट्रेलियाच्या खेळाडूंची 'चोरी' पकडली गेली.

डीव्हिलियर्स हे दक्षिण आफ्रिका संघाचे निवृत्त खेळाडू आहेत. सध्या ते समालोचकाच्या भूमिकेत आहेत. समालोचन करता-करता त्यांनी ऑस्ट्रेलियाच्या खेळाडूंचा 'चोरी छुपके' चाललेला 'खेळ' उघडकीस आणला. मैदानात काहीतरी संशयास्पद घडत असल्याची बाब आपणच कॅमेरामनच्या लक्षात आणून दिली, असं त्यांनी एका मुलाखतीदरम्यान सांगितलं.


ऑस्ट्रेलियाच्या खेळाडूंनी या मालिकेत आधीही चेंडूशी छेडछाड केली आहे. २६, २७ आणि २८ व्या षटकात ते चेंडू रिव्हर्स स्विंग करत आहेत. नक्कीच काहीतरी गौडबंगाल आहे, हे मी आधीच सांगितलं होतं, असंही डीव्हिलियर्स यांनी सांगितलं. 'मैदानात काहीतरी संशयास्पद घडत असल्याचं लक्षात येताच मी लगेच कॅमेरामनला ऑस्ट्रेलियाच्या खेळाडूंकडे लक्ष देण्यास सांगितलं. त्यानंतर कॅमेरामन तब्बल दीड तास त्यांच्यावर लक्ष ठेवून होता. अखेर कॅमरनजवळ त्यांना काहीतरी संशयास्पद वस्तू दिसून आली. कॅमेरामननं बॅनक्रॉफ्टवर करडी नजर ठेवली आणि अखेर तो चेंडूशी छेडछाड करताना पकडला गेला, असं डीव्हिलियर्स यांनी सांगितलं.