सैनीच्या निवडीनंतर गंभीरची बेदी-चौहानवर टीका

नवी दिल्ली

महाराष्ट्र टाइम्स.कॉम

अफगाणिस्तानविरुद्धच्या कसोटीसाठी वेगवान गोलंदाज मोहम्मद शमीच्या जागी नवदीप सैनीची निवड केल्यानंतर आज भारतीय क्रिकेटपटू गौतम गंभीरने भारतीय संघाचे माजी कर्णधार बिशन सिंह बेदी आणि चेतन चौहान यांच्यावर ट्विटरवरून टीका केली आहे.

अफगाणिस्तानविरुद्ध खेळल्या जाणाऱ्या एकमेव कसोटीसाठी काल निवड समितीनं नवदीप सैनीची भारतीय संघात निवड केली होती. यानंतर गौतम गंभीरने दिल्ली आणि जिल्हा क्रिकेट असोसिएशन (डीडीसीए) चे सदस्य असलेले बिशन सिंह बेदी यांच्यावर टीका केली आहे. माजी कर्णधार बिशन सिंह बेदी आणि चेतन चौहान यांना टॅग करीत एक ट्विट केले आहे. मी 'बाहेरील व्यक्ती' नवदीप सैनीची भारतीय संघात निवड केल्यानंतर डीडीसीएच्या काही सदस्यांप्रती शोक व्यक्त करतो आहे. मला सांगितले आहे की, 'काळा आर्म बँड (दंडावर लावली जाणारी काळी पट्टी) बेंगळुरूमध्ये २२५ रुपये प्रती किलोने मिळतेय. महोदय, केवळ हे ध्यानात ठेवा, नवदीप मूळचा कुठला आहे, त्यापेक्षा तो सर्वात आधी भारतीय आहे, असं गंभीरनं ट्विटमध्ये म्हटलंय.



पाच वर्षांपूर्वी बिशन सिंह बेदी यांनी तत्कालीन दिल्ली क्रिकेट असोसिएशनचे अध्यक्ष अरुण जेटली यांना पत्र पाठवले होते. त्या पत्रात त्यांनी विदर्भाविरुद्ध रणजी ट्रॉफी सामना खेळण्यासाठी दिल्ली संघाकडून सैनीच्या निवडीवर आक्षेप घेत नाराजी व्यक्त केली होती. बाहेरील व्यक्ती असलेल्या नवदीप सैनीची दिल्ली संघात निवड का करण्यात आली, असं म्हणत बेदींनी या निवडीवर आक्षेप घेतला होता.