इराणी करंडक: गुजरात ८ बाद ३००

मुंबई : चिराग गांधीच्या एकाकी लढ्याच्या जोरावर गुजरात संघाने इराणी करंडक क्रिकेट लढतीत शेष भारत संघाविरुद्ध पहिल्या डावात ८ बाद ३०० धावा केल्या. पहिल्या दिवसाचा खेळ थांबला तेव्हा गांधी १५९ चेंडूंत १८ चौकार व १ षटकारसह १३६ धावांवर खेळत होता.

ब्रेबर्न स्टेडियममध्ये येथे सुरू असलेल्या या लढतीच्या पहिल्या खेळावर खरेतर शेष भारत संघाने वर्चस्व राखले होते. समित गोहेल (०), प्रियांक पंचाल (३०), ध्रुव रावल (३९) आणि पार्थिव पटेल (११) यांना झटपट गुंडाळण्यात शेष भारताला यश आले. त्यामुळे गुजरातची एक वेळ ४ बाद ८२ अशी स्थिती होती. यानंतर मनप्रीत जुनेजा आणि गांधीने पाचव्या विकेटसाठी शतकी भागीदारी रचली. जुनेजा ९० चेंडूंत ४७ धावांवर बाद झाल्यानंतर सिद्धार्थ कौलने करण पटेल (१३) आणि मोहित थडानी (४) यांनाही झटपट माघारी पाठवले. गांधीने तळाच्या फलंदाजांच्या साथीने छोट्या छोट्या भागीदारी करून गुजरातला ३०० धावांचा टप्पा ओलांडून दिला. शेष भारताकडून सिद्धार्थ कौलने चार, तर पंकजसिंहने ३ विकेट घेतल्या.

स्कोअरबोर्डः गुजरात ८८ षटकांत ८ बाद ३०० (चिराग गांधी खेळत आहे १३६, मनप्रीत जुनेजा ४७, ध्रुव रावल ३९, प्रियांक पंचाल ३०, सिद्धार्थ कौल ४-७३, पंकजसिंह ३-७७, हेरवाडकर १-१३) वि. शेष भारत.