'गंभीर' शिक्षेपासून वाचला गौतम, बंदी टळली

मटा ऑनलाइन वृत्त । नवी दिल्ली

भारताचा सलामी फलंदाज गौतम गंभीरला दिल्ली रणजी प्रशिक्षक केपी भास्कर यांच्याशी झालेल्या वादाबाबत दोषी ठरवत चार सामन्यांतून निलंबित करण्याचा निर्णय शनिवारी घेण्यात आला. मात्र याप्रकरणी नेमलेल्या चौकशी समितीचे अध्यक्ष न्या. विक्रमजीत सेन यांनी या निलंबनाच्या निर्णयाला दोन वर्षांपर्यंत सशर्त स्थगिती दिली. गंभीरला जर हा आदेश मान्य असेल आणि तो या प्रकारची कोणतीही चूक पुन्हा करणार नसेल तर ३० मार्च २०१९ पर्यत ही शिक्षा निलंबित राहणार आहे.

या संपूर्ण प्रकाराबाबत माहिती देताना सेन म्हणाले, 'दिल्ली आणि जिल्हा क्रिकेट संघ (डीडीसीए) चा संघ ओडीशा दौऱ्यावर होता, तेव्हा ही घटना घडली. गौतम गंभीर आणि केपी भास्कर यांच्यात शाब्दिक चकमक झडली. भास्कर यांनी यासंबंधी तक्रार केली. त्यानंतर १० मार्च २०१७ रोजी मी दोघांचीही भेट घेतली. पण हे प्रकरण समाधानकारकपणे मिटले नाही.'

केपी भास्कर यांच्याबाबत गंभीरची वागणूक योग्य नव्हती, त्यामुळे हे प्रकरण गंभीर आहे, यावर समितीचे सदस्य सहमत होते. त्यामुळे गंभीरला शिक्षा व्हावी, पण ती अशाप्रकारे द्यावी की अशा प्रकाराची पुनरावृत्ती होऊ नये आणि संघाच्या सर्व खेळाडूंनी ही बाब गंभीरपणे घ्यावी, असे समितीचे मत होते, अशी माहिती सेन यांनी दिली.