'ते' ट्विट माझे नाही; हार्दिक पंड्याने केले स्पष्ट

नवी दिल्ली :

भारतीय राज्यघटनेचे शिल्पकार डॉ. बाबासाहेब आंबेडकर यांच्याबद्दल आक्षेपार्ह ट्विट केल्याप्रकरणी टीम इंडियाचा अष्टपैलू खेळाडू हार्दिक पंड्या याच्याविरोधात गुन्हा दाखल करण्याचे आदेश जोधपूरमधील न्यायालयाने दिलेले असताना हार्दिक पंड्याने एक निवेदन जारी करून या ट्विटशी आपला कोणताही संबंध नसल्याचे स्पष्ट केले आहे. पंड्याने आपल्या अधिकृत ट्विटर अकाऊंटवरच हे निवेदन पोस्ट केले आहे.

'मीडियात आज दिशाभूल करणाऱ्या अनेक बातम्या पसरल्या. डॉ. बाबासाहेब आंबेडकर यांचा अवमान करणारे ट्विट मी केल्याचा आरोप त्यातून झाला. मात्र, यात कोणतंही तथ्य नसून अशाप्रकारचं कोणतंही विधान मी ट्विटर वा अन्य कोणत्याही माध्यमातून केलेलं नाही. ज्या ट्विटवरून काहूर माजलं आहे ते ट्विट माझ्या नावाच्या एका बनावट अकाऊंटवरून करण्यात आलेले आहे', असे पंड्याने स्पष्ट केले. ट्विटरवर माझं व्हेरिफाइड अकाऊंट असून त्या अकाऊंटच्या माध्यमातूनच मी नेहमी संवाद साधत आलो आहे, असेही पंड्याने आपल्या निवेदनात नमूद केले आहे.

'डॉ. बाबासाहेब आंबेडकर, भारताची राज्यघटना आणि भारतातील विविध जनसमुदायांबद्दल माझ्या मनात नितांत आदर आहे. माझ्यामुळे कुणी दुखावलं जाईल, असे विधान मी करणं शक्य नाही वा अशा कोणत्याही वादात मी पडत नाही. केवळ चाहत्यांशी संवाद साधण्यासाठीच मी सोशल मीडियाचे व्यासपीठ वापरतो, असेही पंड्याने पुढे स्पष्ट केले.

हे ट्विट माझे नसल्याचे सिद्ध करण्यासाठी मी आवश्यक पुरावे कोर्टाकडे सादर करेन तसेच माझ्याविरोधातील याचिका मागे घेण्याची विनंती करेन, असेही पंड्याने नमूद केले आहे.