हरमनप्रीतची पदावनती होणार

चंदीगढ : भारतीय टी-२० महिला संघाची कर्णधार आणि महिलांच्या राष्ट्रीय संघाची उपकर्णधार हरमनप्रीत कौरला पंजाब पोलिसात उपअधीक्षक पदाची नोकरी मिळाली खरी पण तिने त्यासाठी सादर केलेली पदवी खोटी निघाल्यामुळे तिला आता हवालदार या पदावर पदावनत करण्यात येणार आहे.

एका वरिष्ठ सरकारी अधिकाऱ्याने यासंदर्भात सांगितले की, 'हरमनप्रीतची पदवी बनावट असल्याचे सिद्ध झाल्यानंतर तिचे शिक्षण आता १२वीपर्यंतच धरण्यात येईल. या शिक्षणाला अनुसरून तिला हवालदार हे पद दिले जाईल.'

अर्थात, याबाबत पोलिस महासंचालनालयाचे मत अद्याप जाहीर झालेले नसल्यामुळे सरकारने अंतिम निर्णय घेतलेला नाही. या प्रकरणाची फाइल महासंचालनालयाकडे पाठविण्यात आली असून त्यांचे मत मागविले जाणार आहे.

पंजाबमध्ये उपअधीक्षक पदासाठी उमेदवार हा पदवीधर असणे आवश्यक असते. हरमनप्रीतच्या कागदपत्रांची तपासणी करताना पंजाब पोलिसांना असे दिसून आले की, तिने मीरत येथील चौधरी चरणसिंग विद्यापीठातून घेतलेली पदवी बनावट आहे. हरमनप्रीतच्या वडिलांनी मात्र तिची कागदपत्रे योग्य असल्याचा दावा केला आहे.

हरमनप्रीतने गेल्या वर्षी महिलांच्या वर्ल्डकपमध्ये केलेल्या कामगिरीमुळे पंजाबचे मुख्यमंत्री कॅप्टन अमरिंदरसिंग यांनी तिला पोलिस उपअधीक्षकपदाच्या नोकरीची ऑफर दिली होती.