होप, अॅम्ब्रिसचा विंडीज संघात समावेश

वृत्तसंस्था, नॉर्थ साउंड (अँटिग्वा)

भारताकडून दुसऱ्या वनडे क्रिकेट सामन्यात पराभव पत्करावा लागल्यानंतर वेस्ट इंडिजने उर्वरित तीन सामन्यांसाठी दोन नवीन चेहऱ्यांचा संघात समावेश केला आहे. कायल होप आणि सुनील अॅम्ब्रिस हे दोन नवीन खेळाडू भारतासाठी ‘सरप्राइज पॅकेज’ ठरू शकतात. भारत-विंडीजमधील तिसरी वनडे ३० जून रोजी होणार आहे.

भारतीय संघ सध्या पाच सामन्यांच्या वनडे मालिकेत १-० असा आघाडीवर आहे. मालिकेतील पहिली वनडे पावसामुळे अनिर्णित राहिली आहे. विंडीजने सुरुवातीला केवळ दोन सामन्यांसाठी संघ जाहीर केला होता. बुधवारी वेस्ट इंडिज क्रिकेट बोर्डाने उर्वरित तीन सामन्यांसाठी संघ जाहीर केला. यात तेरा सदस्यीय विंडीज संघात होप आणि अॅम्ब्रिसचा समावेश करण्यात आला आहे. हे दोघे जोनाथन कार्टर आणि के. विल्यम्स यांची जागा घेतील. २८ वर्षीय कायल होप हा, विंडीज संघातील यष्टिरक्षक फलंदाज शाई होपचा मोठा भाऊ आहे. त्यामुळे ही भावांची जोडी आता विंडीज संघाकडून खेळताना दिसेल. कायल होपने ३१ फर्स्ट क्लास सामन्यांत १६२५ धावा केल्या आहेत. भारताविरुद्ध त्याला वनडे पदार्पणाची संधी मिळू शकते. २३ वर्षीय अॅम्ब्रिसलाही आंतरराष्ट्रीय सामन्यांचा अनुभव नाही. यष्टिरक्षक फलंदाज सुनील अॅम्ब्रिसने ३५ फर्स्ट क्लास सामन्यात १६२२ धावा केल्या आहेत.

क्रिकेट वेस्ट इंडिजचे निवड समितीचे अध्यक्ष कॉर्टनी ब्राउन म्हणाले, ‘सुनील आणि कायल हे दोन युवा फलंदाज आहेत. देशांतर्गत स्पर्धांमधील त्यांच्या कामगिरीमुळे संघात त्यांची निवड करण्यात आली आहे. विंडीज ए संघ श्रीलंका दौऱ्यावर गेला असताना कायल हा सलामीला फलंदाजी येत होता. त्याने त्या वेळी लक्षवेधी कामगिरी केली होती. पीसीएल स्पर्धेत त्याने या वर्षी त्रिनिदाद अँड टोबॅगो संघाकडून खेळताना आपली छाप पाडली होती. सुनीलने आमच्या पारंपरिक सुपर-५० वनडे क्रिकेट स्पर्धेत चांगली कामगिरी केली होती. आता या दोघांना भारताविरुद्ध आपले कौशल्य दाखविण्याची आणि राष्ट्रीय संघाला आपले योगदान देण्याची संधी आहे.’

वेस्ट इंडिज संघ : जेसन होल्डर (कर्णधार), सुनील अॅम्ब्रिस, देवेंद्र बिशू, रोस्टन चेस, मिगूएल कमिन्स, कायल होप, शाई होप, अल्झारी जोसेफ, एव्हिन लेविस, जेसन महंमद, अॅश्ले नर्स, कायरन पॉवेल, रोवमन पॉवेल.