आता आधीसारखा जोश राहिला नाही!- धोनी

मटा ऑनलाइन वृत्त । मोहाली

न्यूझीलंडविरुद्धच्या तिसऱ्या वनडेत ८० धावांची तडाखेबंद खेळी करून टीम इंडियाच्या विजयात महत्त्वाची भूमिका बजावणाऱ्या कॅप्टन कूल महेंद्रसिंग धोनीला वाढत्या वयाची जाणीव होऊ लागली आहे. आता आपल्यात आधीसारखी चपळता राहिली नाही, चोरट्या धावा काढून स्ट्राइकची अदलाबदल करत राहण्यासाठी लागणारा जोश थोडा कमी झालाय, अशी कबुली त्यानं स्वतःच मोहालीतील विजयानंतर दिली. त्यामुळे येत्या काळात धोनी चौथ्या क्रमांकावरच फलंदाजीला येण्याची शक्यता आहे.

जगातील सर्वोत्तम 'फिनिशर'च्या यादीत महेंद्रसिंग धोनीचं स्थान खूपच वरचं आहे. 'रनिंग बिटविन द विकेट' आणि ताकदवान फटके खेळण्यात धोनी 'माही'र आहे. त्या जोरावरच, सहाव्या क्रमांकावर फलंदाजीला येऊन, सगळी सूत्रं हातात घेत 'हेलिकॉप्टर शॉट' लगावून धोनीनं अनेक सामन्यांत विजय अक्षरशः खेचून आणलाय. पण कालच्या सामन्यात तो चौथ्या क्रमांकावर फलंदाजीला आला होता. स्वाभाविकच, या निर्णयाबद्दल त्याला सामन्यानंतर विचारलं असता, त्यानं अत्यंत खरं-खरं उत्तर दिलं. ते त्याच्या चाहत्यांना थोडं काळजीत टाकणारं आहे.

'मी जवळपास २०० हून अधिक सामन्यांत खालच्या क्रमांकावर फलंदाजी केली आहे. पण आता पीचवर वेगानं धावण्याची क्षमता थोडी कमी झाली आहे. त्यामुळे मी वरच्या क्रमांकावर फलंदाजीला येण्याचा निर्णय घेतला आणि इतर शिलेदारांना समारोपाची संधी दिली', असं धोनीनं सांगितलं. त्यामुळे त्याच्या वयाबद्दल, फिटनेसबद्दल चर्चा सुरू झाली आहे.

धोनी ३५ वर्षांचा असून वनडे आणि टी-२० वर लक्ष केंद्रीत करण्यासाठी त्यानं कसोटी क्रिकेटमधून निवृत्ती स्वीकारली आहे. त्यामुळे भारताच्या कसोटी संघाची धुरा विराट कोहलीकडे सोपवण्यात आली असून लवकरच वनडेचं कर्णधारपदही त्याला द्यावं, असं अनेक माजी क्रिकेटपटूंचं मत आहे. आता धोनीनंच, ताकद कमी झाल्याचं मान्य केल्यानं या चर्चेला पुन्हा हवा मिळू शकते.