मितालीला वगळणे चुकीचे

नवी दिल्ली: मिताली राज प्रकरणामुळे भारतातील महिला क्रिकेट ढवळून निघालेले असताना भारताचे माजी कर्णधार सुनील गावस्कर यांनी मितालीला पाठिंबा दर्शविला आहे. मितालीला वर्ल्डकप टी-२० स्पर्धेत इंग्लंडविरुद्धच्या उपांत्य सामन्यात वगळण्यात आले होते. त्या लढतीत भारताला पराभव स्वीकारावा लागल्यानंतर मितालीला वगळल्याचा फटका बसल्याची चर्चा सुरू झाली.

गावस्कर यांनी मितालीला पाठिंबा दर्शविताना म्हटले आहे की, मला मितालीबद्दल सहानुभूती वाटते. तिचा मुद्दा योग्यच आहे. तिने २० वर्षे भारतीय क्रिकेटला दिली. वर्ल्डकपमधील दोन सामन्यात ती सर्वोत्तम खेळाडूही ठरली. तिला एका सामन्यात दुखापतीमुळे खेळता आले नाही. पण पुढच्या सामन्यात ती तंदुरुस्त होती. हीच परिस्थिती जर विराट कोहलीच्या बाबतीत असती तर विराटला संघाबाहेर बसवता आले असते का ? बाद फेरीसाठी तुम्ही सर्वोत्तम खेळाडूंना संधी द्यायला हवी. मितालीच्या अनुभवाचा उपयोग करून घेता आला असता.

रमेश पोवारबाबत गावस्कर म्हणाले की, इथे बसून पोवारबाबत बोलणे शक्य नाही. पण कारण काहीही असले तरी मितालीसारख्या संघाबाहेर बसवणे योग्य नव्हते. विजयी संघच कायम ठेवण्याचा निर्णय घेण्यात आला, हे कारण पुरेसे नाही.