अ‍ॅपशहर

पाकिस्तानचा भरपाईचा दावा फेटाळला

द्विराष्ट्रीय क्रिकेट मालिकेसाठी केलेल्या परस्पर सामंजस्य कराराचे उल्लंघन केल्याचा आरोप करत भारतीय क्रिकेट बोर्डाकडून पाकिस्तानने केलेली भरपाईची मागणी आंतरराष्ट्रीय क्रिकेट परिषदेच्या यासंदर्भातील समितीने फेटाळली. त्यामुळे भारतीय क्रिकेट बोर्डाचे याबाबतचे म्हणणे या समितीने स्वीकारल्याचे स्पष्ट झाले.

PTI 21 Nov 2018, 12:03 am
बीसीसीआयचा विजय, द्विराष्ट्रीय मालिकेसंदर्भातील वाद मिटला
महाराष्ट्र टाइम्स.कॉम icc rejects pakistans 70 million compensation claim
पाकिस्तानचा भरपाईचा दावा फेटाळला


दुबई/कराची : द्विराष्ट्रीय क्रिकेट मालिकेसाठी केलेल्या परस्पर सामंजस्य कराराचे उल्लंघन केल्याचा आरोप करत भारतीय क्रिकेट बोर्डाकडून पाकिस्तानने केलेली भरपाईची मागणी आंतरराष्ट्रीय क्रिकेट परिषदेच्या यासंदर्भातील समितीने फेटाळली. त्यामुळे भारतीय क्रिकेट बोर्डाचे याबाबतचे म्हणणे या समितीने स्वीकारल्याचे स्पष्ट झाले.

आयसीसीच्या या समितीने २६ पानांच्या निकालपत्रात केवळ एका ओळीत निकाल दिला आणि पाकिस्तानची मागणी फेटाळण्यात आल्याचे नमूद केले. शिवाय, हा निकाल बंधनकारक आहे आणि त्याविरोधात अपील करता येणार नाही, अशी टिप्पणीही केली आहे.

पाकिस्तान क्रिकेट बोर्डाने या कराराचा भंग केल्याचा आरोप करत भारतीय क्रिकेट बोर्डाकडून ४४७ कोटी रुपयांची मागणी केली होती. भारत आणि पाकिस्तान यांच्यात २०१५ ते २०२३ या कालावधीत सहा मालिका व्हायला हव्यात असे पाकिस्तानचे म्हणणे होते.

भारतीय क्रिकेट बोर्डाने त्यावर आपली बाजू मांडताना म्हटले होते की, सदर सामंजस्य करार हा बंधनकारक नव्हता आणि महसूलाच्या आराखड्यासंदर्भात जेव्हा भारताने आयसीसीला काही सूचना केल्या तेव्हा पाकिस्तानने त्याला पाठिंबा देण्याचे वचन निभावले नाही. शिवाय, असेही नमूद केले की, पाकिस्तानशी क्रिकेट खेळण्याचा मुद्दा हा सरकारकडून मंजुरी मिळण्यावर अवलंबून आहे. २००८मध्ये मुंबईवर झालेल्या हल्ल्यानंतर ही परवानगी केंद्राकडून देण्यात आलेली नाही.

भारतीय क्रिकेट बोर्डाचे प्रशासकीय समितीचे प्रमुख विनोद राय म्हणाले की, आमची बाजू उचलून धरण्यात आली याचे समाधान आहे. पाकिस्तान बोर्डाने ज्याला सामंजस्य करार म्हटले आहे तो प्रत्यक्षात केवळ एक प्रस्ताव आहे. या निकालाबद्दल बीसीसीआयच्या कायदा समितीचे अभिनंदन. आता बीसीसीआयकडून पाकिस्तान क्रिकेट बोर्डावर या संपूर्ण खटल्याच्या खर्चाची भरपाई मिळण्यासाठी दावा दाखल केला जाईल. आम्ही या समितीपुढे ही खर्चाची सगळी माहिती सादर करू आणि पाकिस्तानकडून हा खर्च वसूल करू.

महत्वाचे लेख

Marathi News App: तुम्हालाही तुमच्या अवतीभवती होत असलेल्या बदलांमध्ये सहभागी व्हायचं आहे? सिटिझन रिपोर्टर अॅप डाउनलोड करा आणि रिपोर्ट्स पाठवा.
ताज्या बातम्यांसह अपडेट राहण्यासाठी लाइक करा Maharashtra Times फेसबुकपेज