झुंज आयर्लंडशी

महिला टी-२० वर्ल्डकप

गयानाः

भारत आणि आयर्लंड आज, गुरुवारी महिला टी-२० वर्ल्डकप स्पर्धेत आमनेसामने येणार आहेत. या वर्ल्डकपमध्ये भारताने सलग दोन विजय मिळवले असल्याने आयर्लंडविरुद्धही भारतीय महिलांनाच 'फेव्हरिट' समजले जात आहे. सलग तिसरा विजय मिळवून उपांत्य फेरीतील स्थान निश्चित करण्याचे लक्ष्य हरमनप्रीत कौरच्या नेतृत्वाखालील भारतीय संघाने बाळगले आहे.

भारताने पहिल्या लढतीत न्यूझीलंडला नमविले होते. यानंतर दुसऱ्या लढतीत पारंपरिक प्रतिस्पर्धी पाकिस्तानलाही धूळ चारली. त्यामुळे भारतीय महिला संघाचा आत्मविश्वास उंचावला आहे. पहिल्या लढतीत कॅप्टन हरमनप्रीत कौरने आक्रमक शतक ठोकले होते. त्याच मैदानावर भारतीय संघ आयर्लंडविरुद्ध खेळणार आहे. आयर्लंडला आधीच्या दोन्ही सामन्यांत (ऑस्ट्रेलिया आणि पाकिस्तान) पराभव पत्करावा लागला आहे. या लढतीत भारतीय संघाचे पारडे जड असले, तरी आयर्लंडला कमी लेखण्याची चूक भारतीय संघ करणार नाही. कारण, यापूर्वीही वर्ल्ड कपसारख्या मोठ्या स्पर्धेत मोठे उलटफेर झाले आहेत. भारतीय महिलांसाठी महत्त्वाची गोष्ट म्हणजे संघ एकाच खेळाडूवर अवलंबून नाही. पहिल्या लढतीत जेमिमा रॉड्रिगेजने अर्धशतक ठोकले होते, तर हरमनने ५१ चेंडूंत १०३ धावा केल्या होत्या. पाकिस्तानविरुद्ध मिताली राजने अर्धशतक झळकावले होते. स्मृती मानधना आणि वेदा कृष्णमूर्तीकडून मोठ्या खेळीची अपेक्षा आहे. गोलंदाजीत डी. हेमलता, पूनम यादव यांनी आतापर्यंत चमक दाखवली आहे. आयर्लंडविरुद्धही त्यांच्याकडून अशाच कामगिरीची अपेक्षा आहे.

टी-२० रँकिंग

भारतीय महिला संघ - ५

आयर्लंड महिला संघ - १०

- सामन्याची वेळ: रात्री ८.३० पासून