भारतीय संघ घालणार नारिंगी जर्सी

नवी दिल्ली :

वर्ल्डकप क्रिकेट स्पर्धेच्या काही निवडक सामन्यांमध्ये भारतीय संघ नारिंगी रंगाची जर्सी परिधान करणार आहे. इंग्लंडविरुद्ध ३० जूनला होणाऱ्या सामन्यातही टीम इंडिया नेहमीच्या निळ्या रंगाच्या जर्सीऐवजी ही नारिंगी रंगाची जर्सी असेल.

बीसीसीआयच्या सूत्रांनी दिलेल्या माहितीनुसार बीसीसीआयची मार्केटिंग विभाग या जर्सीवर अजूनही काम करत असून लवकरच या जर्सीचे अनावरण होईल. आयसीसीच्या स्पर्धांसाठी सहभागी संघांना दोन वेगवेगळ्या रंगांच्या जर्सी वापरणे बंधनकारक असते. इंग्लंडविरुद्धच्या सामन्यात भारत आणि इंग्लंडच्या एकाच निळ्या रंगातील जर्सीमुळे गोंधळ होऊ नये म्हणून भारताने नारिंगी रंगाची जर्सी वापरण्याचे ठरविले आहे. अफगाणिस्तानविरुद्धच्या सामन्यातही भारत नारिंगी रंगाच्या जर्सीचा वापर करणार आहे. कारण अफगाणिस्तानच्या जर्सीचा रंगही निळाच आहे. दक्षिण आफ्रिकेने बांगलादेशविरुद्धच्या सामन्यात पिवळ्या रंगाची जर्सी घातली होती. बांगलादेश आणि अफगाणिस्तान यांनी स्पर्धेआधीच आपल्या दोन वेगवेगळ्या रंगांच्या जर्सीची घोषणा केली होती. बांगलादेश हिरवा आणि लाल रंग वापरणार आहे.