धोनीनं पंचाकडून चेंडू का घेतला? चर्चेला उधाण

नवी दिल्ली:

इंग्लंडविरुद्धच्या दुसऱ्या वनडेत 'टुकुटुकु' फलंदाजी केल्यानं टीकेचा धनी ठरलेल्या महेंद्रसिंग धोनीच्या निवृत्तीची चर्चा सोशल मीडियावर सुरू आहे. तिसरी वनडे लढत संपल्यानंतर धोनीनं पंचांकडून चेंडू मागून घेतला. त्यानं असं का केलं? तो निवृत्त होणार का? असे तर्कवितर्क आता लढवले जात आहेत.

सामना संपल्यानंतर धोनीचा मैदानातील एक व्हिडिओ सोशल मीडियावर व्हायरल झाला आहे. त्यात धोनी पंचांशी चर्चा करत असून, त्यांच्याकडून चेंडू घेत असल्याचं दिसत आहे. कसोटीतून निवृत्तीची घोषणा करण्याआधी त्यानं अशीच काहीशी कृती केली होती. त्यामुळं आता वनडेतूनही तो निवृत्त होणार का? या चर्चेनं जोर धरला आहे.



'तेव्हा' नेमकं काय घडलं होतं?

धोनीनं २०१४ मध्ये कसोटी क्रिकेटमधून संन्यास घेतला होता. ऑस्ट्रेलियाविरुद्धचा कसोटी सामना संपल्यानंतर त्यानं स्टम्प काढून घेतले होते. आता त्यानं पंचांकडून चेंडू मागून घेतल्यानं निवृत्त होणार असल्याचा अंदाज बांधला जात आहे.