डिविलियर्सची पहिल्या ३ वनडेंतून माघार

केपटाऊन :

दक्षिण आफ्रिकेचा 'हुकमी एक्का' म्हणजेच एबी डिविलियर्स दुखापतीमुळे पहिल्या तीन वनडे सामन्यांमध्ये खेळू शकणार नाही, असे 'क्रिकेट साऊथ आफ्रिका'कडून आज स्पष्ट करण्यात आले आहे. यजमानांसाठी हा फार मोठा धक्का आहे.

भारत-दक्षिण आफ्रिका वनडे मालिका १ फेब्रुवारी रोजी सुरू होत आहे. या मालिकेत ६ वनडे सामने खेळवले जाणार असून दुखापतीमुळे पहिल्या तीन सामन्यांतून डिविलियर्सला माघार घ्यावी लागली आहे.

जोहान्सबर्ग येथे तिसऱ्या आणि मालिकेतील शेवटच्या कसोटी सामन्यात झेल पकडताना डिविलिर्यसच्या हाताच्या बोटाला दुखापत झाली होती. ही दुखापत पूर्ण बरी होण्यासाठी दोन आठवड्यांचा कालावधी लागणार आहे. त्यामुळेच डिविलियर्सने डर्बन, प्रिटोरिया आणि केपटाऊन वनडेतून माघार घेतली असून असून याबाबत आज अधिकृत माहिती देण्यात आली.

दरम्यान, डिविलियर्सच्या जागी अन्य खेळाडूचा संघात समावेश करण्यात आलेला नाही. डिविलियर्स तंदुरुस्त होऊन चौथ्या वनडेत खेळेल अशी आशा आहे, असे 'क्रिकेट साऊथ आफ्रिका'ने नमूद केले.