कोलकाता कसोटी: श्रीलंकेची दमदार सुरूवात

मटा ऑनलाइन वृत्त । कोलकाता

भारताविरुद्धच्या पहिल्या कसोटी सामन्यात पाहुण्या श्रीलंका संघाने दमदार सुरूवात केली आहे. भारताचा पहिला डाव १७२ धावांत संपुष्टात आणल्यानंतर श्रीलंकेने तिसऱ्या दिवसअखेर ४ बाद १६५ धावांची मजल मारली आहे. अंधुक प्रकाशामुळे तिसऱ्या दिवसाचा खेळ लवकर थांबवण्यात आला.

श्रीलंकेच्या डावाची सुरुवात झाल्यानंतर भुवनेश्वरने सलामीवीर दिमुथ करुणारत्नेला पायचीत बाद केले. त्यानंतर दुसरा सलामीचा फलंदाज सदिरा समरविक्रमाला झेलचीत बाद केले. मात्र, त्यानंतर आलेल्या अँजेलो मॅथ्यूज आणि लाहिरी थिरीमान्ने यांनी अधिक पडझड न होऊ देता धावफलक हलता ठेवला. हे दोघेही अर्धशतकी खेळी साकारल्यानंतर बाद झाले. खेळ संपला तेव्हा कर्णधार दिनेश चंडिमल (१३ धावा) आणि निरोशन डिकवेल्ला (१४ धावा) खेळपट्टीवर होते. कसोटीचे अद्याप दोन दिवस बाकी आहेत.

तत्पूर्वी, चेतेश्वर पुजाराचं अर्धशतक आणि यष्टिरक्षक वृद्धिमान साहासोबत तळाच्या फलंदाजांनी लावलेल्या हातभारामुळे भारताला दीडशतकी टप्पा ओलंडता आला. चेतेश्वर पुजाराने ५२ धावांची खेळी केली तर वृद्धीमान साहा (२९ धावा) रविंद्र जाडेजा (२२ धावा) आणि मोहम्मद शमीने (२४ धावा) उपयुक्त खेळी साकारली.

स्कोअरकार्ड पाहण्यासाठी क्लिक करा