विंडीजचा एक डाव, ९२ धावांनी धुव्वा

मटा ऑनलाइन वृत्त । अँटिगा

भारताने पहिल्या कसोटीत एक डाव आणि ९२ धावांनी दणदणीत विजय मिळवत वेस्ट इंडिज दौऱ्यात विजयी सलामी दिली आहे. पहिल्या डावात वेगवान माऱ्यापुढे ढेपाळलेला विंडीजचा संघ दुसऱ्या डावात भारताच्या फिरकी माऱ्याने बेजार झाला. आर. अश्विनने विंडीजला सात धक्के देत भारताच्या विजयावर शिक्कामोर्तब केले. विशेष म्हणजे भारतीय उपखंडाबाहेर टीम इंडियाने मिळवलेला हा सर्वात मोठा कसोटी विजय ठरला आहे.

अँटिगा येथील सर व्हिवियन रिचर्डस स्टेडियमवर झालेल्या या सामन्यात ३२३ धावांची आघाडी मिळाल्याने भारताने विंडीजवर फॉलोऑन लादला होता. दुसऱ्या डावात खेळताना विंडीजला सुरुवातीलाच क्रेग ब्रेथवेटच्या रूपाने पहिला धक्का बसला. तिसऱ्या दिवशीचा खेळ थांबला तेव्हा विंडीजच्या १ बाद २१ धावा झाल्या होत्या. त्यानंतर आज चौथ्या दिवशीही विंडीजच्या फलंदाजीचा भारतीय माऱ्यापुढे टिकाव लागला नाही. पहिल्या डावात ११३ धावांची खेळी करणाऱ्या अश्विनने अष्टपैलू कामगिरी करत विंडीजच्या दुसऱ्या डावाला आपल्या फिरकीने सुरूंग लावला. अश्विनने २५ षटकांत ८३ धावांच्या मोबदल्यात विंडीजच्या ७ फलंदाजांना पॅव्हेलियनचा रस्ता दाखवला.
सामन्याचे स्कोअरकार्ड
१३२ धावांतच विंडीजचे ८ फलंदाज माघारी परतले होते मात्र कार्लोस ब्रॅथवेट (नाबाद ५१) आणि देवेंद्र बिशू (४५ धावा) यांनी नवव्या विकेटसाठी ९२ धावांची भागिदारी करून भारताचा विजय काहीसा लांबवला. बिशू बाद झाल्यानंतर लागोपाठ गॅब्रिएलला त्रिफळाचीत करून अश्विनने भारताच्या विजयाची औपचारिकता पूर्ण केली. यजमान विंडीजचा डाव ७८ षटकांत २३१ धावांमध्ये संपुष्टाच आला. पहिल्या डावात विंडीजने २४३ धावा केल्या होत्या. अष्टपैलू कामगिरी करणाऱ्या अश्विनला सामनावीर घोषित करण्यात आले.

दरम्यान, विराट कोहलीचं द्विशतक आणि अश्विनच्या शतकाच्या जोरावर भारताने पहिल्या डावात आठ बाद ५६६ अशी मोठी धावसंख्या उभारली होती. विंडीजचे या धावांचा पाठलाग करताना नाकीनऊ आले. पूर्ण सामन्यात भारताने विंडीजला जराही डोके वर काढू दिले नाही. या विजयाने भारतीय संघाच्या प्रशिक्षक पदाची पहिली परीक्षा देणाऱ्या अनिल कुंबळेलाही मोठं बळ मिळणार आहे.