अ‍ॅपशहर

भारताची राखीव फळी मजबूत

आदल्यादिवशी भारताचा माजी कर्णधार सचिन तेंडुलकरने इंग्लंड दौऱ्यावरील भारतीय संघाला भुवनेश्वरकुमारची पोकळी प्रामुख्याने जाणवेल, अशी अटकळ व्यक्त केली होती; पण भारताचा माजी कसोटीपटू अन् यशस्वी तेज गोलंदाज झहीर खानच्या मते भारतीय क्रिकेट संघाची राखीव फळी मजबूत आहे.

Maharashtra Times 23 Jul 2018, 4:00 am
म. टा. क्रीडा प्रतिनिधी, मुंबई
महाराष्ट्र टाइम्स.कॉम zaheer-khan


आदल्यादिवशी भारताचा माजी कर्णधार सचिन तेंडुलकरने इंग्लंड दौऱ्यावरील भारतीय संघाला भुवनेश्वरकुमारची पोकळी प्रामुख्याने जाणवेल, अशी अटकळ व्यक्त केली होती; पण भारताचा माजी कसोटीपटू अन् यशस्वी तेज गोलंदाज झहीर खानच्या मते भारतीय क्रिकेट संघाची राखीव फळी मजबूत असून भुवनेश्वरकुमार आणि जसप्रीत बुमराह (दुखापतीमुळे पहिल्या कसोटीला मुकणार) यांची अनुपस्थिती जाणवणार नाही, असे भाकीत केले आहे. येत्या १ ऑगस्टपासून भारत-इंग्लंड कसोटी मालिकेला सुरुवात होते आहे. पहिली कसोटी एजबॅस्टन, बर्मिंगहॅम येथे रंगणार आहे. निवड समितीने इंग्लंड दौऱ्यावरील पहिल्या तीन कसोटींसाठी निवडलेल्या भारतीय संघात जसप्रीत बुमराह, इशांत शर्मा, मोहम्मद शमी, उमेश यादव आणि शार्दूल ठाकूर या तेज गोलंदाजांना संधी दिली आहे. यासह अष्टपैलू हार्दिक पंड्याचाही कसोटी संघात समावेश आहे.

बीसीसीआयने यासह हेदेखील स्पष्ट केले आहे की जसप्रीत बुमराह जायबंदी असला तरी तो दुसऱ्या कसोटीपासून निवडीला उपलब्ध असेल. 'बुमराह पहिल्या कसोटीसाठी उपलब्ध नसेल, भुवनेश्वर तीन कसोटींना मुकेल. तसे असले तरी मला वाटते की ही मालिका पाच कसोटींची असून भुवीची पोकळी भरून काढण्यासाठी भारताकडे इतरही चांगले पर्याय उपलब्ध आहेत', असे झहीर म्हणाला. आपले विधान अधिक विस्तृत मांडत तो सांगतो की, 'उमेश यादव चांगली कामगिरी करतो आहे, इशांत आता संघातील सीनियर तेज गोलंदाज आहे, तर मोहम्मद शमीचा रेकॉर्डही चांगला आहे. असे असताना फार चिंता करण्याचे कारण नाही. मला माहिती आहे की भुवनेश्वरची जागा कुणी भरून काढू शकत नाही; पण तरीदेखील मला असे वाटते की भारताची राखीव फळी समर्थ आहे'.

दृष्टिक्षेप

१)भुवनेश्वर आणि बुमराह यांची गैरहजेरी जाणवू देणार नाही, अशी मजबूत राखीव फळी भारताकडे आहे, असे भारताला वाटते.

२)भारतीय निवड समितीने बुमराह, इशांत शर्मा, शमी, उमेश यादव आणि शार्दूल ठाकूर या तेज गोलंदाजांची भारतीय संघात निवड केली आहे.

३)पहिल्या कसोटीला १ ऑगस्टपासून बर्मिंगहॅम येथे सुरुवात होईल.


महत्वाचे लेख

Marathi News App: तुम्हालाही तुमच्या अवतीभवती होत असलेल्या बदलांमध्ये सहभागी व्हायचं आहे? सिटिझन रिपोर्टर अॅप डाउनलोड करा आणि रिपोर्ट्स पाठवा.
ताज्या बातम्यांसह अपडेट राहण्यासाठी लाइक करा Maharashtra Times फेसबुकपेज