भारत-श्रीलंका
लढत उद्या
पुणे : अंधांच्या भारत-श्रीलंका टी-२० क्रिकेट मालिकेला १५ ऑक्टोबरपासून प्रारंभ होत असून, सलामीचा सामना नेहरू स्टेडियममध्ये सोमवारी रंगणार आहे, अशी माहिती 'क्रिकेट असोसिएशन फॉर दी ब्लाइंड ऑफ महाराष्ट्र'चे अध्यक्ष रवी वाघ यांनी दिली. पुण्यापाठोपाठ मुंबई (१६ ऑक्टो.), भोपाळ (१७ ऑक्टो.), लुधियाना (२० ऑक्टो.), फरिदाबाद (२२ ऑक्टो), दिल्ली (२३ ऑक्टो.), भुवनेश्वर (२५ ऑक्टो.), कोलकाता (२७ ऑक्टो.) येथे या मालिकेतील सामने होणार आहेत. या मालिकेत अमोल करचे, अनिल बेलसरे, प्रवीण करलुके हे महाराष्ट्राचे खेळाडू कौशल्य पणाला लावणार आहेत.
-----------
'सतेज'चा विजय
पुणे : सतेज, सुवर्णयुग या संघांनी अनंता पाडाळे स्मृती जिल्हा अजिंक्यपद कबड्डी स्पर्धेत आपापल्या प्रतिस्पर्ध्यावर विजय नोंदविला. पुरुष गटात बाणेरच्या सतेज संघाने हडपसरच्या सुवर्ण स्पोर्ट्स क्लबवर ३७-१९ अशी मात केली. मध्यंतराला दोन्ही संघांत ११-११ अशी बरोबरी होती. विजयात सुनील दुबिले, सतीश पाटील यांनी मोलाचा वाटा उचलला. सुवर्ण क्लबकडून गणेश नवले, सुजित टोके यांनी दिलेली लढत अपुरी पडली.
महिला गटात सुवर्णयुग संघाने करूंजाई संघावर ५९-५ असा दणदणीत विजय नोंदविला. समीक्षा कोल्हे, अपेक्षा कोरवे यांच्या सुरेख कामगिरीच्या जोरावर शिवप्रताप संघाने तळजाई प्रतिष्ठानवर ३८-१४ अशी मात केली. तसेच, राजमाता जिजाऊ संघाने शिवाई संघावर ४६-७ अशी सहज मात केली. विजयात मानसी सावंत आणि अंकिता जगताप यांनी मोलाचा वाटा उचलला. तसेच, पळसनाथ संघाने राष्ट्रमाता जिजाऊ सघावर ३५-१४ असा विजय नोंदविला. पळसनाथ संघाच्या विजयात आरती बनसोडे, प्रतीक्षा गांधिले यांनी मोलाचा वाटा उचलला.