टीम इंडियाचा ऑस्ट्रेलियावर दणदणीत विजय

मटा ऑनलाइन वृत्त। नवी दिल्ली

पावसाने व्यत्यय आणल्यानंतर पुन्हा सुरू झालेल्या भारत विरुद्ध ऑस्ट्रेलियाच्या वनडे मालिकेतील पहिलाच सामना भारताने डकवर्थ लुइस नियमांतर्गत २६ धावांनी जिंकला. महेंद्रसिंग धोनी (७९) आणि हार्दिक पंड्या (८३) यांच्या शानदार खेळींच्या जोरावर टीम इंडियाने ७ विकेट गमावत २८१ धावा केल्या. भारताच्या डावानंतर पावसाने व्यत्यय आणला आणि ऑस्ट्रेलियाला २१ षटकांमध्ये १६४ धावांचे लक्ष्य मिळाले. ऑस्ट्रेलिया संघ मात्र ९ विकेट गमावत केवळ १३७ धावाच करू शकला.

धोनी (७९) आणि हार्दिक पंड्या (८३) यांनी दमदार खेळाचे दर्शन घडवत ११८ धावांची भागीदारी केली. पंड्याने तुफान फटकेबाजी करत ६६ चेंडूंमध्ये ५ चौके आणि ५ छक्के लगावत वनेडमधील आपले दुसरे अर्धशतक ठोकले. धोनीने ८८ चेंडूंमध्ये ४ चौकार आणि २ षटकार ठोकले. धोनीनेही आपल्या वनडे कारकिर्दीतील ६६ वे अर्धशतक ठोकले. धोनीच्या नावे कसोटीमध्ये ३३ तर, टी-२० मध्ये एका अर्धशतक आहेत.

भारतीय कर्णधार विराट कोहलीने नाणेफेक जिंकून प्रथम फलंदाजी करण्याचा निर्णय घेतला. खेळ सुरू झाल्यानंतर भारताची वाटचाल म्हणावी तशी चांगली झाली नाही. भारताने केवळ ११ धावांवर ३ गडी गमावण्याची नामुष्कीही आली. शिखर धवनच्या स्थानी रहाणेने सलामीला आणल्यानंतर त्याला या संधीचा फायदा उचलता आला नाही. डावाच्या चौथ्या षटकामध्ये नेथन कॉल्टर-नाइलच्या बाहेर जाणाऱ्या चेंडूवर रहाणेने आपल्या स्वभावाच्या विरुद्ध जात मोठा फटका खेळण्याचा प्रयत्न केला. चेंडू बॅटला चाटून जात सरळ विकेटकीपर मॅथ्यू वेडच्या हातात विसावला. रहाणेने १५ चेंडूंमध्ये केवळ ५ धावा केल्या.
आपल्या पुढच्याच षटकात कॉल्टर-नाइलने कर्णधार कोहलीला बाद करत टीम इंडियाला जोरदार धक्का दिला. कोहलीने पॉइंटवरून फटका खेळण्याचा प्रयत्न केला, परंतु ग्लेन मॅक्सवेलने अफलातून उडी घेत आपल्या टीमला मोठे यश मिळवून दिले. याच षटकात मनीष पांडेला विकेटकीपर वेडच्या हस्ते झेलबाद करत कॉल्टर-नाइलने तिसरे यश मिळवले. यानंतर रोहित शर्माने केदार जाधवसोबत भारतीय डाव सांभाळला.

रोहित आणि जाधवने चौथ्या विकेटवर ५३ धावा जोडल्या. भारताची धावसंख्या ६४ असताना रोहितने २८ धावांवर स्टॉयनीसच्या चेंडूवर कॉल्टर-नाइलच्या हाती चेंडू सोपवत तंबूचा रस्ता पकडला. स्टॉयनीसच्या एका आखूड चेंडूवर पुल करण्याच्या प्रयत्नात जाधव फाइन लेगवर झेलबाद झाला.

यानंतर महेंद्रसिंग धोनी मैदानात उतरला. त्याने जाधवसोबत रुळावरून घसरलेली टीम इंडियाची गाडी सावरण्याचा प्रयत्न केला. मात्र त्याचे प्रयत्नही फार काळ टिकले नाहीत. जाधव ४० धावांवर बाद झाला. धोनी आणि पंड्याने पु्न्हा शतकी भागीदारी करत भारताचा धावसंख्या २०० वर पोहोचवली. पंड्याला डावाच्या ४१ व्या षटकात ऑस्ट्रेलियाचा युवा स्पिनर अॅडम जम्पाने आपली शिकार बनवले.

धोनीने पुन्हा भुवनेश्वर कुमारसोबत ७२ धावांची भागीदारी केली. धोनी डावाच्या अंतिम षटकातील चौथ्या चेंडूंवर जेम्स फॉकनरच्या चेंडूवर बाद झाला. भुवनेश्वरने ३० चेंडूंमध्ये आपल्या नाबाद खेळीत ५ चौकार ठोकले. ऑस्ट्रेलियाच्या कॉल्टर-नाइलने तीन आणि मध्यम तेज गोलंदाज स्टायनीसने दोन बळी मिळवले. लेग स्पिनर जम्पा आणि फॉकनरला प्रत्येकी एक-एक विकेट मिळाले.