भारतापुढे विजयासाठी १९४ धावांचे लक्ष्य

बर्मिंगहॅम :

भारतीय गोलंदाजांनी भेदक मारा करत इंग्लंडचा दुसरा डाव १८० धावांत गुंडाळला असून भारताला विजयासाठी १९४ धावांची गरज आहे. संयमी फलंदाजी केल्यास मालिकेतील पहिला सामना जिंकून आघाडी घेण्याची संधी भारताला आहे.

एजबस्टन कसोटीत पहिल्या डावात २८७ धावा करणाऱ्या यजमान इंग्लंडची दुसऱ्या डावात भारतीय गोलंदाजीपुढे दाणादाण उडाली. एकवेळ ७ बाद ८७ अशी दयनीय अवस्था इंग्लंडची झाली होती. मात्र, इंग्लंडच्या तळाच्या फलंदाजांनी सुरेख फलंदाजी केली. सॅम कुर्रनने ६३ धावांची अर्धशतकी खेळी करत आदिल रशीद आणि स्टुअर्ट ब्रॉडच्या साथीने इंग्लंडची धावसंख्या १८० पर्यंत नेली.

इशांत शर्माने अचूक मारा करत ५ बळी टिपले. पहिल्या डावात इंग्लंडला ४ धक्के देणाऱ्या रविचंद्रन अश्विनने दुसऱ्या डावातही आपल्या फिरकीची जादू दाखवत इंग्लंडच्या तीन फलंदाजांना तंबूत पाठवले. उमेश यादवने २ बळी टिपले.

दरम्यान, इंग्लंडने दिलेल्या १९४ धावांच्या लक्ष्याचा पाठलाग करताना भारताला १९ धावांवर मुरली विजयाच्या रुपाने पहिला धक्का बसला आहे.

भारत वि. इंग्लंड कसोटीचे स्कोअरकार्ड