भारतासाठी ‘आर या पार’ची लढत

आज न्यूझीलंडविरुद्ध विजय आवश्यक

वृत्तसंस्था, डर्बी

भारतीय महिला संघाची आज (शनिवार) वन-डे क्रिकेट वर्ल्ड कप स्पर्धेत न्यूझीलंडविरुद्ध लढत होणार आहे. ही लढत जिंकणारा संघ उपांत्य फेरीत दाखल होईल. त्यामुळे ‘करा अथवा मरा’ स्वरुपाची ही लढत असणार आहे. इंग्लंड, ऑस्ट्रेलिया आणि दक्षिण आफ्रिका या संघांनी आपले उपांत्य फेरीतील स्थान यापूर्वीच निश्चित केले आहे.

सलग चार विजयानंतर भारतीय महिलांना सलग दोन पराभव पत्करावे लागले. यामुळे भारताचा पुढील प्रवास अवघड झाला आहे. भारतीय महिलांनी ‘मिशन वर्ल्ड कप’ला धडाक्यात सुरुवात केली. पण दक्षिण आफ्रिका आणि ऑस्ट्रेलियाविरुद्ध भारतीय महिलांची कामगिरी निराशाजनक राहिली. आता आव्हान राखण्यासाठी न्यूझीलंडविरुद्ध भारतीय महिलांना सर्वोत्तम खेळ करावा लागणार आहे. पूनम राऊत (२७७ धावा), मिताली राज (२४७ धावा) यांनी आतापर्यंत चांगली कामगिरी केली आहे. मात्र, वन-डेत सहा हजार धावांचा टप्पा ओलांडणाऱ्या मितालीला धावांचा वेग वाढवावा लागणार आहे. ऑस्ट्रेलियाविरुद्ध तिने ११४ चेंडूंत ६९ धावा केल्या होत्या. स्मृती मानधनाने स्पर्धेला चांगली सुरुवात केली. मात्र, मागील चार लढतींत तिला ३, ४, ८ आणि २ अशाच खेळी करता आल्या आहेत. हरमनप्रीत कौर, वेदा कृष्णमूर्ती, सुष्मा वर्मा, झूलन गोस्वामी, दीप्ती शर्मा यांना फलंदाजीत अधिक भार उचलावा लागणार आहे.

गोलंदाजीत भारताकडे पूनम यादव (७ विकेट्स), मानसी जोशी (२), शिखा पांडे (५), दीप्ती शर्मा (७), एकता बिश्त (९), झूलन गोस्वामी (४) आणि हरमनप्रीत कौर (५) असे अनेक पर्याय आहे. फक्त प्रतिस्पर्धी फलंदाज मोठी भागीदारी रचणार नाहीत, याची काळजी यांना घ्यावी लागणार आहे. या स्पर्धेतील भारताचे क्षेत्ररक्षण अगदीच निराशाजनक राहिले आहे. पहिल्या तीन लढतींत भारतीय महिलांनी आठ झेल सोडले. दक्षिण आफ्रिकेविरुद्ध ‘मिसफिल्ड’ करून दहा धावा अतिरिक्त दिल्या. ऑस्ट्रेलियाविरुद्ध भारतीय महिलांनी अगदी साध्या साध्या चुका केल्या. याकडे लक्ष देण्याची अधिक गरज आहे. आता मागील पराभव विसरून एक संघ म्हणून भारताला आपली छाप पाडावी लागणार आहे.

दुसरीकडे, न्यूझीलंडलाही ही लढत जिंकण्याशिवाय पर्याय नाही. न्यूझीलंडचे आठ लढतींत सात गुण झाले आहेत. न्यूझीलंड संघ पाचव्या स्थानी आहे. न्यूझीलंडने वेस्ट इंडिज, पाकिस्तान आणि श्रीलंकेला नमविले आहे. दक्षिण आफ्रिकेविरुद्धची लढत अनिर्णित राहिली होती. मागील लढतीत इंग्लंडविरुद्ध पराभव पत्करावा लागल्याने न्यूझीलंडची वाट खडतर झाली. न्यूझीलंडने भारताला नमविले आणि ऑस्ट्रेलियाने दक्षिण आफ्रिकेला मोठ्या फरकाने पराभूत केले, तर न्यूझीलंड गुणतक्त्यात तिसऱ्या स्थानावर पोहोचू शकतो.
..
आमनेसामने
४४ वन-डे
१६ विजय भारताचे
2७ विजय न्यूझीलंडचे
१ टाय
...
क्रमवारी
न्यूझीलंड – ३
भारत – ४
...
सामन्याची वेळ – दुपारी ३ पासूनपासून