अश्विनची कपिलच्या विक्रमाशी बरोबरी

मटा ऑनलाइन वृत्त । मुंबई

भारताचा भरवशाचा फिरकीपटू रवीचंद्रन अश्विनने २३ वेळा एका डावात पाच गडी बाद करण्याच्या कपिल देवच्या विक्रमाशी बरोबरी केली आहे. मुंबई कसोटीच्या दुसऱ्या दिवशी बेन स्टोकच्या रूपाने अश्विनने डावातील पाचवा बळी टिपला.

अश्विनने काल भारताचा माजी वेगवान गोलंदाज जवागल श्रीनाथ याचा विक्रम मोडला होता. श्रीनाथने ६७ कसोटी सामन्यांत २३६ बळी टिपले असून अश्विनने हा टप्पा ओलांडत मोइन अलीला बाद करत आपल्या खात्यात २३७ बळींची नोंद केली होती. त्यानंतर आज अश्विनने आजही आपल्या फिरकीची जादू दाखवत महान गोलंदाज कपिलची बरोबरी साधली. एका डावात २३ वेळा ५ गडी बाद करण्यासाठी कपिलला १३७ कसोटी सामने आणि २२७ डाव खेळावे लागले होते मात्र अश्विनने अवघ्या ४३ कसोटीत हा पराक्रम करून दाखवला.

भारत वि. इंग्लंड: चौथ्या कसोटीचं स्कोअरकार्ड

भारताकडून एका डावात सर्वाधिक ३५ वेळा पाच गडी बाद करण्याचा विक्रम सध्याचा टीम इंडियाचा मुख्य प्रशिक्षक अनिल कुंबळे याच्या नावावर आहे. त्यानंतर हरभजन सिंगने २५ वेळा एका डावात पाच बळी टिपले आहेत.