आयपीएल: चेन्नईचा दिल्लीवर दणदणीत विजय

चेन्नई:

महाराष्ट्र टाइम्स.कॉम

कर्णधार महेंद्रसिंग धोनीच्या नाबाद ४४ धावा आणि सुरेश रैनाची अर्धशतकी खेळी या जोरावर चेन्नई सुपर किंग्जनं दिल्ली कॅपिटल्सला ८० धावांनी पराभूत केलं. या विजयासह चेन्नई संघ आयपीएल स्पर्धेच्या गुणतालिकेत पुन्हा अव्वल स्थानी पोहोचला.
चेन्नईनं प्रथम फलंदाजी करताना ४ फलंदाजांच्या मोबदल्यात १७९ धावा केल्या. हे आव्हान घेऊन मैदानात उतरलेला दिल्लीचा संघ इम्रान ताहिर (१२/४) आणि रवींद्र जडेजा (९/३) यांच्या फिरकीपुढे कोलमडला. तो अखेरपर्यंत सावरू शकला नाही. संघाला १६.२ षटकांत अवघ्या ९९ धावाच करता आल्या. या विजयासह चेन्नई संघ पुन्हा अव्वल स्थानी पोहोचला, त्याचे १८ गुण झाले आहेत. तर दिल्लीचे १६ गुण आहेत.
चेन्नईच्या डावाची सुरुवात संथ झाली. चेन्नईकडून सुरेश रैनानं अर्धशतक ठोकलं. त्यानं ३७ चेंडूंत ५९ धावा केल्या. फाफ डु प्लेसिसनं ४१ चेंडूंत ३९ धावा केल्या. मात्र, धोनीनं २२ चेंडूत नाबाद ४४ धावा कुटल्या. रवींद्र जडेजानं १० चेंडूंमध्ये २५ धावा केल्या. महेंद्रसिंग धोनी सामनावीर ठरला.