IPL 2018:जानेवारीत होणार खेळाडूंचा लिलाव

पुणे: इंडियन प्रीमियर लीग (आयपीएल)चा लिलाव येत्या वर्षी २७ आणि २८ जानेवारीला बेंगळुरूत होणार आहे. बीसीसीआयच्या एका वरिष्ठ अधिकाऱ्याने या वृत्ताला दुजोरा दिला आहे.

आंतरराष्ट्रीय स्तरावर खेळणाऱ्या बहुतेक खेळाडूंच्या आगमनानंतर २७ आणि २८ जानेवारीला हा मोठा लिलाव होणार असल्याचे या अधिकाऱ्याने अधिक माहिती देताना सांगितले.

बेंगळुरूतच यापूर्वी सर्व लिलाव आयोजित करण्यात आले होते. हे ठिकाण फ्रॅन्चाइझींचे आवडते ठिकाण झाले आहे. या वर्षीच्या लिलावात ८० कोटी रुपयांचे बजेट असणार आहे. यापूर्वी हे बजेट ६६ कोटी रुपयांचे होते. एक फ्रॅन्चाइझी ५ खेळाडूंना त्याच संघात कायम ठेवू शकते. यात २ राइट टू मॅच कार्ड देखील अंतर्भूत आहे.

यापूर्वी राजस्थान रॉयल्सने खेळाडूंना त्याच संघात कायम स्वरूपी ठेवण्याचे धोरण आणि राइट टू मॅचचे धोरण समाप्त करण्याची सूचना केली होती. तर, किंग्ज इलेव्हन पंजाबने केवळ दोनच खेळाडूंना त्याच संघात ठेवण्यात यावे असा सल्ला दिला होता. बहुतेक इतर संघांनी ३ ते ५ खेळाडूंना राइट टू मॅचसह संघात कायम ठेवण्याचा सल्ला दिला होता.