बंद डोळ्यांनीही शतक ठोकेनः ख्रिस गेल

मटा ऑनलाइन वृत्त । नवी दिल्ली

मी स्वतःच स्वतःला 'युनिव्हर्स बॉस' ही उपाधी घेतली आहे. क्रिकेटच्या मैदानावर मी जो पराक्रम करून दाखवलाय, त्यासाठी हे 'टायटल' योग्यच आहे. मी बंद डोळ्यांनीही शतक ठोकू शकतो, अशी गर्जना क्रिकेटविश्वातील स्फोटक फलंदाजांपैकी एक असलेल्या ख्रिस गेलनं केली आहे.

आयपीएल-१० मध्ये रॉयल चॅलेंजर्स बेंगलोरचा पार बोऱ्या वाजलाय. एकापेक्षा एक रथी-महारथी फलंदाज असतानाही, कोलकात्यानं त्यांचा ४९ धावांत खुर्दा पाडला होता. इतर सामन्यांतही हे वाघ ढेपाळल्याचंच पाहायला मिळालं. या पार्श्वभूमीवर, दिल्लीविरुद्धच्या त्यांच्या शेवटच्या सामन्यानंतर 'नवभारत टाइम्स'नं गेलशी गप्पा मारल्या. त्यावेळी, वाढत्या वयाच्या माझ्या खेळावर कुठलाही परिणाम झालेला नाही, होणार नाही, असं त्यानं ठामपणे सांगितलं. मी क्रिकेटविश्वाचा बादशाह आहे, बॉस आहे, असंही तो गडगडाटी हास्य करत म्हणाला.

* यंदा आरसीबीची कामगिरी चांगली झाली नाही. काय वाटतं?
>> क्रिकेट हे आपल्या आयुष्यासारखंच आहे. कधी चांगले दिवस असतात, तर कधी आपण विचार करतो तसं काहीच घडत नाही. तसंच काहीसं यावेळी झालं. पण आम्ही त्यातून बरंच काही शिकलो.

* तुम्ही स्वतःला 'युनिव्हर्स बॉस' म्हणवता? हे बिरुद कुणी दिलं?
>> मी स्वतःच हे बिरुद घेतलं आहे. मी त्यासाठी योग्य आहे असं तुम्हाला वाटत नाही का? मी क्रिकेटविश्वात जे काही मिळवलंय, त्या आधारेच वर्ल्ड बॉस या उपाधीला अपग्रेट करून मी युनिव्हर्स बॉस हे टायटल घेतलंय. माझ्या चाहत्यांनाही ते आवडलंय.

* पण यावेळी युनिव्हर्स बॉस IPL मध्ये अपयशी ठरला?
>> हो. खरंय. क्रिकेटप्रेमींना माझ्याकडून खूप अपेक्षा होत्या. फास्टेस्ट फिफ्टी, प्रत्येक चेंडूवर चौकार किंवा षटकार त्यांना माझ्याकडून हवा होता. पुढच्या वेळी मी आणखी तयारीने उतरेन आणि धमाका करेन.

* गेलच्या फलंदाजीवर वयाचा परिणाम जाणवू लागलाय, असंही काही जण म्हणताहेत...
>> माझं वय वाढतंय, पण त्यासोबत अनुभवही वाढतोय. तुम्ही जितके समजूतदार व्हाल, तितका जास्त काळ मैदानावर टिकू शकाल. माझं क्रिकेट 'नॅचरल' आहे. मी डोळे झाकूनही सहज शतक करू शकतो. वयाचा परिणाम खेळावर होणार नाही.

* ऋषभ पंतच्या फलंदाजीबद्दल काय वाटतं?
>> छोट्या उंचीच्या या फलंदाजाची कारकीर्द नक्कीच मोठी आहे. त्याच्यात खूप टॅलेंट आहे. चेंडू उंच उडवत राहा आणि खेळाची मजा लूटत राहा, एवढंच मी त्याला सांगेन.

* भारतात वास्तव्य करायला आवडेल?
>> तसं तर मी भारतात वास्तव्य करतोच आहे. भारतीय हे माझ्या कुटुंबातील सदस्यच आहे. या देशाचं माझ्या आयुष्यात मोठं योगदान आहे. इथल्यासारखं आदरातीथ्य क्वचितच कुठे होतं. त्यासाठी मी भारतीयांचा आभारी आहे.