आयपीएल ट्रॉफी सिद्धिविनायक चरणी!

मटा ऑनलाइन वृत्त । मुंबई

मुंबई इंडियन्स संघाचे मालक अंनत अंबानी यांनी आज आयपीएल ट्रॉफीसह सिद्धिविनायक मंदिरात जाऊन दर्शन घेतले. अनंत यांच्यासोबत पोलिसांचा फौजफाटाही दिसत होता. सिद्धिविनायक चरणी ट्रॉफी ठेऊन दर्शन घेऊन अनंत अंबानी माघारी परतले.

अंबानी परिवाराची सिद्धिविनायकावर श्रद्धा आहे. या श्रद्धेतूनच अनंत यांनी ट्रॉफीसह बाप्पांचं दर्शन घेतल्याचं सांगण्यात येत आहे. विशेष म्हणजे केवळ अनंतच नाही तर अनंत यांची आजी, नीता अंबानी यांची आई पुर्णिमाबेन दलाल यांचीही प्रचंड श्रद्धाळू आहेत. अंतिम सामन्याच्या शेवटच्या षटकामध्ये हात जोडून, डोळे बंद करून त्या देवाचा धावा करत असल्याचे चित्र सगळ्यांनीच पाहिलं आहे. त्यातच आज सोशल मीडियातही पुर्णिमाबेन यांचा हा फोटो व्हायरल झाला आहे आणि त्याच्या बातम्याही झाल्या आहेत.

दरम्यान, मुंबई इंडियन्सने २०१३, २०१५ आणि २०१७ असे तीन वेळा आयपीएल अजिंक्यपद पटकावून सगळ्या संघांना मागे टाकले आहे. यंदा प्रथमच अंतिम सामन्यात पोहोचलेल्या पुणे संघाने आयपीएल जिंकण्याचे स्वप्न पाहिले होते. मात्र पुण्याचे स्वप्न भंगले. शेवटच्या चेंडूपर्यंत श्वास रोखून धरायला लावणाऱ्या या सामन्यात मुंबई एका धावेने पुण्यावर विजय मिळवला. या विजयानंतर मुंबई इंडियन्स संघ आणि या संघाच्या चाहत्यांचा आनंद गगनात मावेनासा झाला आहे.