चेन्नईच्या थालाची सगळीकडे क्रेझ! भारताचा सुपरस्टार गायक अरिजीत सिंहने थेट धरले धोनीचे पाय

अहमदाबाद: इंडियन प्रीमियर लीग २०२३चे रणशिंग (IPL 2023) फुंकले गेले आहे.लीगच्या पहिल्या सामन्यात गुजरात टायटन्स आणि चेन्नई सुपर किंग्ज यांच्यात सामना झाला. मात्र, त्याआधी अहमदाबादच्या नरेंद्र मोदी स्टेडियमवर एका शानदार उद्घाटन सोहळ्याचं आयोजन करण्यात आलं होतं. या उद्घाटन सोहळ्यात बॉलिवूड कलाकारांनी त्यांच्या धमाकेदार परफॉर्मन्सने सोहळा अधिक खुलवला. ज्यामध्ये तमन्ना भाटिया, रश्मिका मंदान्ना आणि सुपरस्टार गायक अरिजीत सिंग होते. अरिजीतच्या वेड लावणाऱ्या आवाजाने उदघाटन सोहळ्याची सुरुवात झाली.

अरिजीतला गाताना ऐकणं हा एक सुखद अनुभव आहे. त्याने या परफॉर्मन्सदरम्यान एकापेक्षा एक गाणी गायली. केवळ प्रेक्षकच नाही तर ड्रेसिंग रूममध्ये बसलेले खेळाडूही अरिजीतच्या गाण्यांचा आनंद लूटत होते. सीएसकेचा कर्णधार महेंद्रसिंग धोनीही अरिजीतच्या गाण्याचा आनंद लुटताना दिसला. यानंतर, उद्घाटन समारंभ संपल्यावर सीएसकेचा कर्णधार धोनी मंचावर गेला.

ऋतुराज बहरला... हार्दिकच्या तोंडचे पाणी पळवत केली गतविजेत्यांची धुलाई, चेन्नईचा धावांचा डोंगर
धोनी मंचावर जाताच घडलेल्या घटनेचे सर्वत्र कौतुक होत आहे. धोनी स्टेजवर पोहोचताच अरिजीत सिंगने त्याच्या पायाला स्पर्श केला. यानंतर धोनीनेही अरिजीतला रोखत मिठी मारली. माहीची क्रेझ क्रिकेटसोबतच बॉलीवूडमध्येही किती आहे, याचा आपल्याला प्रत्यय येतो. माही आणि अरिजीत सिंगचा या प्रसंगाचा फोटो आणि व्हिडीओ चांगलाच व्हायरल होत आहे.



कसा होता पहिला सामना

चेन्नई सुपर किंग्ज आणि गुजरात टायटन्स यांच्यात खेळवल्या गेलेल्या पहिल्या सामन्यात गुजरातने बाजी मारली. चेन्नईच्या १७९ धावांच्या लक्ष्याच्या पाठलाग करताना गुजरातने ५ विकेट्स राखत त्यांच्या दमदार विजय मिळवला. चेन्नई सुपर किंग्जसाठी ऋतुराजने ९२ धावांची दमदार खेळी केली पण त्याचे शतक मात्र हुकले. तर गुजरात टायटन्सकडून शुभमन गिलने अर्धशतक झळकावले. तर गोलंदाजांनीही आपली जबरदस्त कामगिरी दाखवून दिली. धोनीने शेवटच्या षटकात आपला नेहमीसारखा फॉर्म दाखवून दिला. एक षटकार एक चौकार मारत चेन्नईच्या धावांमध्ये अधिक भर घातली. धोनी १४ धावांवर नाबाद राहिला. तर कर्णधार हार्दिक पंड्याच्या बॅटमधून केवळ ८ धावाच करता आल्या.