राहुलचे ६० चेंडूत नाबाद शतक; पहिल्या विजयासाठी मुंबईला हव्यात इतक्या धावा

मुंबई: कर्णधार केएल राहुलच्या नाबाद शतकाच्या जोरावर लखनौ सुपर जायंट्सने प्रथम फलंदाजी करताना २० षटकात ४ बाद १९९ धावा केल्या. राहुलने ६० चेंडूत ५ षटकार आणि ९ चौकारांसह नाबाद १०३ धावा केल्या.

वाचा-अर्जुनचे पदार्पण आयत्या वेळी बदलले; रोहित शर्माच्या मास्टर प्लॉनला यश

ब्रेबॉर्न स्टेडियमवर सुरू असलेल्या लढतीत मुंबईचा कर्णधार रोहित शर्माने टॉस जिंकून गोलंदाजी करण्याचा निर्णय घेतला. लखनौच्या डावाची सुरूवात राहुल आणि क्विंडन डी कॉक यांनी केली. या दोघांनी पहिल्या विकेटसाठी ५२ धावा केल्या. मुंबईकडून पदार्पण करणाऱ्या फॅबियन एॅलनने सहाव्या षटकात डी कॉकला २४ धावांवर बाद केले आणि पहिले यश मिळवले. डी कॉकच्या जागी आलेल्या मनिष पांडेने कर्णधार राहुलसोबत अर्धशतकी भागिदारी केली आणि संघाला १००च्या पुढे नेले. लखनौने १० षटकात ९४ धावा केल्या होत्या. मुरुगन अश्विनने पांडेला ३८ धावांवर माघारी पाठवले. १७व्या षटकात उनाडकटने मार्कस स्टॉइनिसला १० तर २०व्या षटकात दिपक हुड्डाला १५ धावांवर बाद केले. केएल राहुलला शतक करण्यासाठी अखेरच्या चेंडूवर १ धाव हवी होती. त्याने उनाडकटला चौकार मारला आणि शतक पूर्ण केले. लखनौकडून राहुल वगळता अन्य फलंदाजांना फार मोठी धावसंख्या करता आली नाही. मुंबईकडून उनाडकटने सर्वाधिक २ विकेट घेतल्या. अश्विनने आणि फॅबियनने प्रत्येकी एक विकेट मिळवली.

मुंबई इंडियन्सची आयपीएलच्या इतिहासातील ही सर्वात खराब सुरूवात आहे. त्यांनी सुरुवातीच्या ५ लढती गमावल्या आहेत. याआधी २०१४च्या हंगामात मुंबईने अशाच सलग ५ लढती गमावल्या होत्या. आयपीएलची सर्वाधिक विजेतेपद मिळवणाऱ्या मुंबईला मेगा लिलावानंतर मोठा फटका बसल्याचे दिसते.