पराभव होऊनही लखनौचा संघ प्ले ऑफमध्ये दाखल होऊ शकतो, फक्त ही एकच असेल अट...

मुंबई : आयपीएलच्या प्ले ऑफचा ज्वर आता चांगलाच चढला आहे आणि प्रत्येक संघ आता विजयासाठी धडपडत आहे. पण दुसरीकडे लखनौ सुपर जायंट्सच्या संघाचा पराभव झाला तरी ते प्ले ऑफमध्ये पोहोचू शकतात, असे आता दिसत आहे. पण त्यासाठी फक्त एकच गोष्ट घडणे गरेजेचे आहे.
पराभवानंतरही लखनौचा संघ कसा काय प्ले ऑफमध्ये पोहोचू शकतो, जाणून घ्या...गुणतालिकेत सध्याच्या घडीला पाहिले तर कोणता संघ प्ले ऑफमध्ये पोहोचेल, हे सांगता येणार नाही. यासाठी अपवाद फक्त गुजरातच्या संघाचा आहे. कारण त्यांचे २० गुण झालेले आहेत. पण बाकीच्या सात संघांमध्ये मात्र चांगलीच चुरस रंगली आहे. आज लखनौ आणि केकेआर यांचा आयपीएलमधील अखेरचा साखळी सामना आहे. या सामन्यात केकेआरच्या संघाने विजय मिळवला तर त्यांचे आव्हान कायम राहील. पण लखनौच्या संघाचा पराभव झाला तरी त्यांचे आव्हान संपुष्टात येणार नाही. कारण सध्याच्या घडीला गुणतालिकेत पाहिले तर केकेआर, पंजाब आणि हैदराबाद यांचे विजयासह १४ गुण होऊ शकतात. गुणतालिकेत सध्याच्या घडीला आरसीबी आणि दिल्ली कॅपिटल्स या दोन्ही संघांचे १४ गुण आहेत. त्यामुळे त्यांनी जर अखेरचा सामना जिंकला तर त्यांचे १६ गुण होऊ शकतात. सध्याच्या घडीला गुणतालिकेत लखनौ आणि राजस्थान यांचे १६ असे समान गुण आहेत. त्यामुळे विजयासह या दोन्ही संघांना १८ गुण पटकावता येतील आणि ते थेट प्ले ऑफमध्ये आपली जागा कायम करतील. आज लखनौचा केकेआरबरोबर सामना आहे. पण आजच्या सामन्यात त्यांचा पराभव झाला तरी त्यांचे १६ गुण राहतील. या १६ गुणांपर्यंत केकेआर, पंजाब आणि हैदराबाद हे संघ पोहैचू शकत नाहीत. आयपीएलमध्ये आता आरसीबी आणि दिल्ली यांचेच फक्त १६ गुण होऊ शकतात. पण यावेळी रन रेट हा सर्वात महत्वाचा मुद्दा ठरू शकतो. सध्याच्या घडीला लखनौच्या संघाचा 0.262 असा रनरेट आहे, तर आरसीबीचा रनरेट हा -0.323 एवढा आहे. त्यामुळे आरसीबीने विजय मिळवला तर त्यांचे १६ गुण होतील. पण त्यांना मोठा विजय मिळवता आला नाही तर १६ गुण झाल्यावरही ते प्ले ऑफमध्ये पोहोचू शकणार नाहीत आणि लखनौचा प्ले ऑफचा मार्ग पराभवानंतरही खुला असेल. त्यामुळे आरसीबीला प्ले ऑफमध्ये पोहोचायचे असेल तर त्यांना फक्त विजय नाही तर मोठा विजय मिळवावा लागेल. दुसरीकडे लखनौचा मोठा पराभव झाला तर त्यांचे आव्हान संपुष्टातही येऊ शकते.