पुन्हा 'तोच' प्रकार घडला; कॅप्टन कूल धोनीनेही दाखवली नाराजी

दुबई : मैदानावरील पंचांचा निर्णय तिसऱ्या पंचांनी बदलल्यानंतर महेंद्र सिंह धोनी नाराज झाल्याचं दिसून आला. राजस्थान रॉयल्स विरुद्ध चेन्नई सुपरकिंग्ज सामन्यातील या प्रकाराने पुन्हा एकदा पंचांच्या खराब निर्णयाकडे लक्ष वेधलं. गेल्या वर्षीही राजस्थानविरुद्धच्या सामन्यात पंचांच्या निर्णयावर संताप व्यक्त करत धोनीने मैदानात धाव घेतली होती. १८ व्या षटकात दीपक चहरच्या गोलंदाजीवर टॉम करनचा झेल धोनीने घेतला आणि कोणतीही अपील न करता पंच सी शमशुद्दीन यांनी बाद असल्याचं सांगितलं. राहुल तेवातियाने अगोदरच एकमेव डीआरएस खर्च केलेला असल्यामुळे करनला डीआरएस मागता आला नाही.

दरम्यान, स्क्वेअर लेगचे पंच विनीत कुलकर्णी आणि शमशुद्दीन यांच्यात चर्चा झाल्यानंतर चूक लक्षात आली. यानंतर निर्णय टीव्ही पंचांकडे सोपवण्यात आला. या रिप्लेमध्ये दिसून आलं की टॉम करनची बॅट आणि चेंडूचा स्पर्षही झाला नव्हता, शिवाय धोनीने झेल घेण्यापूर्वी एक टप्पाही पडला होता. तिसऱ्या पंचांनी हा निर्णय बदलला खरा, मात्र खराब पंच कामगिरीमुळे धोनी प्रचंड नाराज झाल्याचं दिसून आलं.

विशेष म्हणजे गेल्या वर्षी जयपूरमध्येही असाच प्रकार घडला होता. पंच उल्हास गंधे यांच्यासोबत कॅप्टन कूलचंही नियंत्रण सुटलं आणि वाद झाला. कारण, पंचांनी फुलटॉसलाही नो बॉल देण्यास नकार दिला होता. त्यावेळी धोनीने मैदानात प्रवेश आणि पंचांवर राग दाखवत नियम संहितेचं उल्लंघन केलं होतं.