दिल्लीच्या विजयाने प्लेऑफचे समीकरण बदलले; ३ जागा आणि ८ संघ स्पर्धेत

मुंबई: आयपीएल २०२२मध्ये झालेल्या ५८व्या लढतीत दिल्ली कॅपिटल्सने राजस्थान रॉयल्सवर ८ विकेटनी विजय मिळवला. प्रथम फलंदाजी करत राजस्थाने १६० धावा केल्या होत्या. दिल्लीने हे लक्ष्य २ विकेट आणि ८ चेंडू राखून पार केले. प्लेऑफच्या शर्यतीत कायम दिल्लीला या सामन्यात विजय मिळवणे गरजेचे होते.

वाचा- IPLच्या इतिहासात सचिननंतर अशी कामगिरी प्रथमच झाली

दिल्लीविरुद्धच्या सामन्याआधी राजस्थानचे पारडे जड वाटत होते. प्रत्यक्षात दिल्लीने कमाल केली आणि गुणतक्त्यात देखील मोठा फेरबदल केला. दिल्लीच्या या विजयामुळे प्लेऑफची शर्यत आणखी रंजक झाली आहे.

गुणतक्त्यात गुजरात टायटन्सचा संघ अव्वल स्थानावर आहे. गुजरातचे १८ गुण असून त्यांनी प्लेऑफमधील स्थान निश्चित केले आहे. दुसऱ्या स्थानावर लखनौ सुपर जायंट्स, तिसऱ्या क्रमांकावर राजस्थान रॉयल्स, चौथ्यावर रॉयल चॅलेंजर्स बेंगळुरू, पाचव्यावर दिल्ली कॅपिटल्स, सहाव्या स्थानावर सनरायझर्स हैदराबाद, कोलकाता नाईट रायडर्स सातव्या, पंजाब किंग्ज आठव्या तर चेन्नई सुपर किंग्ज आणि मुंबई इंडियन्स अनुक्रमे ९व्या आणि १०व्या स्थानावर आहेत.

वाचा- विजेतेपद मिळवल्यानंतर पाहा कसली ट्रॉफी दिली जाते; सोशल मीडियावर मीम्सचा धुमाकूळ

स्पर्धा आता अखेरच्या टप्प्यात आली असली तरी प्लेऑफमध्ये एकच संघाने स्थान निश्चित केले आहे आणि ३ जागांसाठी एक दोन नव्हे तर ८ संघ स्पर्धेत आहेत. गुणतक्त्यात ९व्या क्रमांकावर असलेला चेन्नईचा संघ देखील प्लेऑफमध्ये पोहोचू शकतो. दिल्लीविरुद्धच्या पराभवाने राजस्थान रॉयल्सचे टेन्शन वाढले आहे. गेल्या ४ सामन्यातील हा त्यांचा तिसरा पराभव ठरलाय.

IPL २०२२चा ताजा गुणतक्ता पाहा

दिल्लीला अजून दोन सामने खेळायचे आहेत. या दोन्हीत विजय मिळवल्यास आणि नेट रनरेट चांगले ठेवल्यास दिल्ली प्लेऑफमध्ये पोहोचू शकते. राजस्थानचे १२ सामन्यात १४ गुण आहेत. त्यांनी देखील शिल्लक दोन लढतीत विजय मिळवल्यास प्लेऑफचे तिकिट मिळू शकले. जर दोन्ही संघांनी उर्वरीत २ सामन्यात फक्त एक विजय मिळवला तर त्यांना अन्य संघाच्या कामगिरीवर अवलंबून रहावे लागले.