करोनामुळे कसोटी सामना रद्द झाला, आता आयपीएलही बंद होणार का; क्रिकेटपटूचा बीसीसीआयला सवाल...

नवी दिल्ली : भारतीय संघात करोनाचा शिरकाव झाल्यामुळे बीसीसीआयने इंग्लंडविरुद्धचा चौथा सामना रद्द केला होता. आता आयपीएलमध्येही करोनाचा शिरकाव झाला आहे. त्यामुळे आता आयपीएलही रद्द करणार का, असा सवाल इंग्लंडच्या कर्णधाराने बीसीसीआयला विचारला आहे.
आजचा सामना सुरु होण्याच्या काही तासांपूर्वीच हैदराबादचा वेगवान गोलंदाज टी. नटराजन हा करोना पॉझिटीव्ह असल्याचे पाहायला मिळाले होते. तसचे इंग्लंडविरुद्धच्या पाचव्या कसोटी सामन्यापूर्वी भारतीय संघाचे फिजिओ योगेश परमार यांना करोना झाला होता आणि त्यानंतर भारतीय खेळाडूंनी हा सामना न खेळण्याचा निर्णय घेतला होता. त्याच धर्तीवर आता आयपीएलही रद्द होणार का, असा सवाल इंग्लंडचा माजी कर्णधार मायकल वॉनने विचारले आहे.

मायकल वॉनने यावेळी म्हटले आहे की, " हैदराबादचा क्रिकेटपटू टी. नटराजनला करोनाची बाधा झाली आहे. करोनामुळे पाचवा कसोटी सामना रद्द झाला होता, तशीच आता आयपीएलही रद्द होणार का... मला खात्री आहे की, असे काहीही होणार नाही." भारताचा पाचवा कसोटी सामना रद्द झाला तेव्हा इंग्लंडच्या आजी-माजी खेळाडूंना वाईट वाटले होते. पण त्यावेळी त्यांनी आपली प्रतिक्रीया दिली नव्हती. कारण त्यावेळी बीसीसीआयने खेळाडूंचे नाव सांगत पाचवा सामना रद्द केला होता. आता त्याच बीसीसीआयच्या आयपीएलमध्ये करोनाचा शिरकाव झाल्यानंतर मात्र इंग्लंडच्या वॉनने आता त्यांना सवाल विचारला आहे.

आयपीएलला आज एक मोठा धक्का बसला आहे. कारण फक्त नटराजन हाच संघाबाहेर नाही, तर त्यानंतर त्याच्यासह संघातील सहा जणांना आयसोलेशनमध्ये ठेवण्यात आले आहे. यात खेळाडू विजय शंकर, टीम मॅनेजर विजय कुमार, सायकोथेरेपिस्ट शाम सुंदर, डॉक्टर अंजना वनान, लाजिस्टिक मॅनेजर तुषार खेडकर आणि नेट गोलंदाज पेरियासमय यांचा समावेश आहे. खेळाडूंची आरटीपीसीआर टेस्ट करण्यात आली आहे. या सर्वांची टेस्ट नेगेटिव्ह आल्याचे बीसीसीआयने स्पष्ट केले आहे. यामुळे आज संध्याकाळी दुबई आंतरराष्ट्रीय स्टेडियमवर होणारी दिल्ली आणि हैदराबाद यांच्यातील लढत नियोजित वेळेनुसार होईल असे बीसीसीआयने स्पष्ट केले आहे.