IPL Mega Auction 2022 : लिलावाच्या दुसऱ्या दिवशी कोणत्या संघाकडे किती रक्कम शिल्लक आहे, जाणून घ्या...

IPL Mega Auction 2022, बंगळुरु : आयपीएल लिलावाच्या पहिल्याच दिवशी एकामागून एक खेळाडूंवर संघांनी महागड्या बोली लावल्या. पण आता या संघांकडे लिलावाच्या दुसऱ्या दिवशी किती रक्कम शिल्लक आहे, जाणून घ्या...
पंजाब किंग्स
दुसऱ्या दिवसासाठी सर्वात जास्त रक्कम ही पंजाब किंग्स या संघाकडे आहे. पंजाबच्या संघाने शिखर धवन आणि कागिसो रबाडासारख्या दिग्गज खेळाडूंना आपल्या संघात दाखल करून घेतले. पण आयपीएलच्या लिलावाच्या दुसऱ्या दिवसासाठी २८.६५ कोटी रुपये एवढी सर्वाधिक रक्कम पंजाब किंग्सकडे आहे.
मुंबई इंडियन्स
मुंबई इंडियन्सने पहिल्याच दिवशी इशान किशन या एकाच खेळाडूसाठी तब्बल १५.२५ कोटी रुपये मोजले. पहिल्या दिवसामध्ये एका खेळाडूसाठी मोजलेली ही सर्वाधिक रक्कम होती. पण आता आयपीएल लिलावाच्या दुसऱ्या दिवसासाठी मुंबई इंडियन्सकडे २७.८५ कोटी रुपये एवढी रक्कम आहे.
चेन्नई सुपर किंग्स
महेंद्रसिंग धोनीच्या नेतृत्वाखाली दीपक चहरसाठी तब्बल १४ कोटी रुपये मोजले, तर ड्वेन ब्राव्होला दुप्पट किंमत देत संघात घेतले. पण तरीही चेन्नई सुर किंग्सकडे दुसऱ्या दिवसाठी २०.४५ कोटी रुपये एवढी रक्कम शिल्लक आहे.
सनरायझर्स हैदराबाद
हैदराबादच्या संघाने पहिल्या दिवशी निकोलस पुरन, वॉशिंंग्टन सुंदरसारख्या दर्जेदार खेळाडूंना आपल्या संघात सामील करून घेतले आहे. इशान किशनसाठी त्यांनी मुंबई इंडियन्सबरोबर चांगलीच झुंज दिली, पण त्यामध्ये ते अपयशी ठरले. पण आता लिलावाच्या दुसऱ्या दिवसासाठी त्यांच्याकडे २०.१५ कोटी रुपये एवढी रक्कम शिल्लक आहे.
गुजरात टायटन्स
यावर्षी आयपीएलमध्ये पहिल्यांदाच दाखल झालेल्या गुजरात टायटन्स या संघाने पहिल्या दिवशी ल्यूकी फर्ग्युसन आणि राहुल तेवातिया यांच्यासाठी अनुक्रमे १० आणि ९ कोटी रुपये खर्च केले. पण तरीही दुसऱ्या दिवसाच्या लिलावासाठी त्यांच्याकडे १८.८५ कोटी रुपये एवढी रक्कम शिल्लक आहे.
दिल्ली कॅपिटल्स
दिल्ली कॅपिटल्सच्या संघाने पहिल्या दिवशी शार्दुल ठाकूरसाठी सर्वाधिक १०.७५ कोटी एवढी रक्कम मोजली. त्याचबरोबर डेव्हिड वॉर्नर, कुलदीप यादवसारखे खेळाड त्यांनी आपल्या संघात घेतले आहे. पण दुसऱ्या दिवसाच्या लिलावासाठी त्यांच्याकडे १६.५० कोटी रुपये शिल्लक आहेत.
केकेआर
केकेआरच्या संघाने पहिल्या दिवशी श्रेयस अय्यरसाठी १२.२५ कोटी रुपये मोजले, तर त्यांनी पॅट कमिन्सलाही आपल्या संघात कायम ठेवले. पण दुसऱ्या दिवसाच्या लिलावासाठी कोलकाता नाइट रायडर्सकडे १२.६५ कोटी रुपये एवढी रक्कम शिल्लक आहे.
राजस्थान रॉयल्स
राजस्थानच्या संघाने लिलावाच्या पहिल्या दिवशी युजवेंद्र चहल, आर. अश्विन, प्रसिध कृष्णासारख्या खेळाडूंना आपल्या ताफ्यात सामील करून घेतले आहे. पण लिलावाच्या दुसऱ्या दिवसासाठी त्यांच्याकडे आता १२.१५ कोटी रुपये एवढी रक्कम शिल्लक आहे.
आरसीबी
आरसीबीने पहिल्या दिवशी फॅफ ड्यू प्लेसिस, दिनेश कार्तिक, जोश हेझलवूड, हर्षल पटेलसारख्या खेळाडूंना आपल्या संघात स्थान दिले आहे. त्यामुळे आता लिलावाच्या दुसऱ्या दिवसासाठी आरसीबीकडे ९.२५ कोटी रुपये एवढी रक्कम शिल्लक आहेत.

लखनौ सुपरजायंट्स
यावर्षी आयपीएलमध्ये वाजत-गाजत, मोठ्या दिमाखात लखनौ सुपरजायंट्सचा संघ दाखल झाला आहे. आयपीएलच्या लिलावापूर्वीच लखनौच्या संघाने सर्वाधिक रक्कम मोजत लोकेश राहुलला आपला कर्णधार जाहीर केला होता. त्यामुळे या लिलावात लखनौचा संघ नेमकं काय करतो, याकडे सर्वांचे लक्ष लागलेले होते. लखनौच्या संघाने आयपीएल लिलावाच्या पहिल्या दिवशी जेसन होल्डर, कृणाल पंड्या, क्विंटन डीकॉक, दीपक हुडासारख्या खेळाडूंना आपल्या ताफ्यात सामील करून घेतले आहे. त्याचबरोबर आयपीएलच्या लिलावापूर्वीच त्यांनी बरीच रक्कम खर्च केली होती. त्यामुळ आयपीएल लिलावाच्या दुसऱ्या दिवशी सर्वात कमी रक्कम ही लखनौच्या संघाकडे दिसत आहे. लखनौच्या संघाकडे लिलावाच्या दुसऱ्या दिवसासाठी ६.९० कोटी रुपये एवढी रक्कम शिल्लक आहे.

लिलावाच्या पहिल्या दिवसानंतर प्रत्येक संघाला आपण किती रक्कम खर्च केली आणि किती रक्कम शिल्लक आहे, याचा अंदाज नक्कीच आला आहे. आता उर्वरीत रक्कमेमध्ये त्यांना आपला ३०-३५ खेळाडूंचा संघ बांधायचा आहे. त्यामुळे लिलावाच्या दुसऱ्या दिवशी प्रत्येक संघ हा सावधपणे खेळाडूंची निवड करताना दिसू शकतो.