IPL2020: मुंबई इंडियन्सचे चेन्नईपेक्षा पारडे जड, 'हे' आहे महत्वाचे कारण

यावर्षीच्या आयपीएलमध्ये पहिला सामना चेन्नई सुपर किंग्स आणि मुंबई इंडियन्स यांच्यामध्ये होणार आहे. पण या सामन्यात सध्याच्या घडीला चेन्नईपेक्षा मुंबईचेच पारडे जड दिसत आहे. पण यामागे नेमके कारण आहे तरी काय, जाणून घ्या...

चेन्नईचा संघा अजूनही काही गोष्टींमधून सावरलेला दिसत नाही. सुरेश रैना आणि हरभजन सिंग हे तर यावर्षी संघात नसतील. त्याचबरोबर करोना झाल्यानंतर वेगवान गोलंदाज दीपक चहर कधीपासून संघाबरोबर खेळेल, ही गोष्टही पाहावी लागेल. चेन्नईच्या संघातून सलामीला कोण येणार? रैनाची जागा कोण घेणार? वेगवान गोलंदाजी कोण करणार? असे बरेच प्रश्न चेन्नच्या संघापुढे आहेत.


रैनाचा पर्याय म्हणून ऋतुराज गायकवाडकडे पाहिले जात होते. पण ऋतुराज अजूनही करोना पॉझिटीव्ह आहे. त्यामुळे चेन्नईला आता अन्य पर्यायांवर विचार करावा लागणार आहे. चेन्नईच्या संघात युवा खेळाडूंचा कमी समावेश असल्याचे पाहायला मिळत आहे. शेन वॉटसन, फॅफ ड्यू प्लेसिस, महेंद्रसिंग धोनी, इम्रान ताहिर, ड्वेन ब्राव्हो हे खेळाडू आता चाळीशीच्या जवळ आलेले आहेत. त्यामुळे या हंगामात त्यांच्याकडून कशी कामगिरी होते, याकडेही सर्वांचे लक्ष असेल.

मुंबईचा संघ हा चांगलाच समतोल असल्याचे दिसत आहे. मुंबईच्या संघाची फलंदाजी ही पूर्णपणे संतुलित असल्याचे पाहायला मिळत आहे. कारण संघाचे सलामीवीर ठरलेले आहेत. त्याचबरोबर मध्यल्या आणि तळाच्या फळीतील फलंदाजही ठरलेले आहे. संघात हार्दिक आणि कृणाल हे दोघे पंड्या बंधू चांगले अष्टपैलू आहेत. त्याचबरोबर किरॉन पोलार्डही चांगल्या फॉर्मात दिसत आहे. त्यामुळे मुंबईचा फलंदाजीची जास्त चिंता नसेल.


मुंबईकडे जसप्रीत बुमरा आणि ट्रेंट बोल्ट हे सध्याच्या घडीचे अव्वल दोन वेगवान गोलंदाज आहेत. या दोघांपैकी एकाने तरी मुंबईला सुरुवातीला विकेट्स मिळवून दिले त्याचा संघाला नक्कीच फायदा होणार आहे. या दोघांना साथ द्यायला मिचेल मॅक्लेघनही संघात असेल. त्यामुळे फलंदाजी आणि गोलंदाजी या दोन्ही विभागांमध्ये मुंबईचा संघ सध्यातरी चेन्नईपेक्षा सरस दिसत आहे.