पोस्टमास्तरने २४ कुटुंबियांचे १ कोटी बुडवले; IPL सामन्यांवर दोन वर्षापासून लावत होता सट्टा

भोपाळ: आयपीएलच्या १५व्या हंगामाचा थरार अखेरच्या टप्प्यात आला आहे. गेल्या दीड महिन्यांपासून सुरू असलेल्या या स्पर्धेत गुजरातचा संघ फायनलमध्ये पोहचला आहे. आता राजस्थान, लखनौ आणि बेंगळुरू यापैकी एक संघ फायनलमध्ये दाखल होईल. आयपीएलच्या काळात फॅटसी लीगमध्ये मोठ्या प्रमाणात पैसे टाकले जातात. या शिवाय सट्टेबाजी देखील जोरदार सुरू असते.

मध्य प्रदेशमध्ये एका पोस्टमास्तरने आयपीएल लिलावात १ कोटी रुपये गमावले. धक्कादायक म्हणजे ही रक्कम त्याची स्वत:ची नव्हती तर २४ कुटुंबीयांनी पोस्ट ऑफिसमध्ये मुदत ठेव (FD) म्हणून ठेवली होती. सर्व सामान्य गुंतवणुकदारांसाठी FD हा सर्वात सुरक्षित पर्याय असतो. यात धोका कमी असल्याने अनेक जण गुंतवणुकीसाठी FDचा पर्याय निवडतात. सरकारी, खासगी बँकांसह पोस्ट ऑफिसमध्ये देखील ही सुविधा असते.

वाचा- अर्जुनच्या करिअरबद्दल सचिन तेंडुलकर प्रथमच बोलला; क्रिकेटवर प्रेम असेल तर...

राज्यातील सागर जिल्ह्यातील बीना सब पोस्ट ऑफिसमधील पोस्टमास्तर विशाल अहिरवार याने बनावट FD खात्यासाठी खरे पासबुक तयार केले. गेल्या दोन वर्षापासून या बनावट खात्यातील रक्कम त्याने आयपीएलच्या लिलावासाठी वापरली. हा प्रकार उघडकीस आल्यानंतर विशालला अटक करण्यात आली असून त्याने गुन्हा कबुल देखील केलाय.

वाचा- स्वत:च्या चुकीने बाद झाला आणि राग काढला अश्विनवर, पाहा व्हिडिओ

बीना जीआरपीचे स्टेशन प्रमुख अजय धुर्वे यांनी दिलेल्या माहितीनुसार, विशाल अहिरवारवर कलम ४२० (फसवणूक) आणि कलम ४०८ आयपीसी अंतर्गत गुन्हा दाखल करण्यात आलाय. यासंदर्भात अधिक तपास सुरू असून त्यानुसार आणखी कलम लावली जाऊ शकतात.

वाचा- IPL इतिहासात एलिमेनेटरमध्ये फक्त एकाच संघाला अशी कामगिरी करता आली