कोलकाता : आयपीएलच्या अकराव्या मोसमात पूर्वनियोजनानुसार पुण्याला होणाऱ्या प्ले-ऑफच्या लढती कोलकात्याला हलवण्याचा निर्णय घेण्यात आला आहे. आयपीएलच्या नियामक समितीने शुक्रवारी याविषयी माहिती दिली. २३ व २५ मे रोजी होणाऱ्या या लढती आता कोलकात्यातील इडन गार्डन्सवर रंगतील, असे आयपीएल नियामक समितीचे अध्यक्ष राजीव शुक्ला यांनी सांगितले. इडन गार्डन्सची आसनक्षमता ६७,००० इतकी असून, ती पुण्याच्या स्टेडियमपेक्षा अधिक असल्याने प्ले-ऑफ सामने कोलकात्याला खेळवण्याचा निर्णय झाला. हा निर्णय एकमताने घेण्यात आल्याचे बीसीसीआयचे प्रभारी अध्यक्ष सीके खन्ना यांनी सांगितले.
'भर सुधारणेवर'
हैदराबादः सध्या गुणतक्त्यात अव्वल असलेल्या हैदराबाद संघाचा कर्णधार केन विल्यमसनचे ध्येय ठरले आहे. खूप मोठे निर्धार करण्यापेक्षा लहान ध्येय समोर ठेवण्यावर त्याचा विश्वास आहे. यामुळेच चोख कामगिरी होण्यापेक्षा सामन्यागणिक सुधारणा करण्यावर भर द्या, असे त्याने सहकाऱ्यांना सांगितले आहे. हैदराबादने आठपैकी सहा लढती जिंकल्या असून कामगिरीत सातत्य राखण्यावर विल्यमसन आणि कंपनीचा भर आहे.
एबी फिट, डीकॉक मुकणार
पुणेः आज, शनिवारी रंगणाऱ्या चेन्नई सुपर किंग्ज विरुद्धच्या लढतीला रॉयल चॅलेंजर्स बेंगळुरूचा यष्टीरक्षक क्विंटन डीकॉक मुकणार आहे. एबी डीव्हिलियर्स मात्र फिट झाला आहे, अशी माहिती बेंगळुरूचा प्रशिक्षक डॅनिएल व्हिटोरीने दिली. डीकॉक मायदेशी परतला आहे. एका लग्नसमारंभात हजेरी लावण्यासाठी डीकॉक मायदेशी परतला आहे. मुंबई इंडियन्सविरुद्धच्या विजयात महत्त्वाची भूमिका पार पाडणाऱ्या कॉलिन डी ग्रँडहोमचे व्हिटोरीने कौतुक केले. ग्रँडहोमने मुंबईविरुद्धच्या सामन्यातील अखेरच्या षटकात तीन षटकार फटकावले होते.