जीवदानाचा फायदा घेत डीकॉकने साकारले धडाकेबाज शतक, लखनौने केली केकेआरची धुलाई

नवी मुंबई : एक झेल किती महागात पडू शकतो, याचा प्रत्यय यावेळी केकेआर आणि लखनौ यांच्यातील सामन्यात पाहायला मिळाला. कारण लखनौचा सलामीवीर क्विंटन डीकॉकला यावेळी १२ धावांवर जीवदान मिळाले. या जीवदानाचा चांगलाच फायदा घेत डीकॉकने शतक झळकावले आणि लखनौच्या संघाला धावांचा डोंगर उभारून दिला. डीकॉकने यावेळी ७० चेंडूंत १० चौकार आणि १० षटकारांच्या जोरावर नाबाद १४० धावांची धडाकेबाज खेळी साकारली. त्यामुळेच लखनौच्या संघाला केकेआरपुढे २११ धावांचे आव्हान ठेवता आले. लखनौचा कर्णधार लोकेश राहुलने यावेळी नाबाद ६८ धावांची खेळी साकारली.

उमेश यादवच्या गोलंदाजीवर डीकॉकने थर्ड मॅनला मोठा फटका मारला. हा चेंडू हवेत जास्त उडाला आणि केकेआरच्या तोमरसाठी हा एक सोपा झेल ठरू शकला असता. पण तोमरने यावेळी चेंडूचा योग्य अंदाज घेतला नाही आणि त्याच्या हातून झेल सुटला. डीकॉक त्यावेळी १२ धावांवर फलंदाजी करत होता. हा झेल सुटला आणि त्यानंतर लखनौच्या संघाचे नशिबच बदलले. कारण त्यानंतर डीकॉकबरोबर कर्णधार लोकेश राहुलही बिनधास्तपणे खेळायला लागला आणि लखनौच्या संघाला यावेळी २११ धावांचे आव्हान ठेवता आले.

लखनौच्या संघाने यावेळी टॉस जिंकला आणि प्रथम फलंदाजीचा निर्णय घेतला. सुरुवातीला डीकॉक आणि राहुल यांनी सावधपणे सुरुवात केली. त्यामध्येच डीकॉकला जीवदान मिळाले. त्यानंतर मात्र डीकॉक आणि राहुल यांनी मागे वळून पाहिलं नाही. कारण या दोघांनी त्यानंतर केकेआरच्या गोलंदाजीवर कडक प्रहार केल्याचे पाहायला मिळाले. डीकॉक आणि राहुल यांनी सुरुवात जरी सावध केली असली तरी सेट झाल्यावर मात्र या दोघांनी आपल्या पोतडीतील एकामागून एक फटके बाहेर काढले आणि त्याची तोड केकेआरच्या गोलंदाजीकडे नसल्याचे पाहायला मिळाले. सहा षटकांच्या पॉवर प्लेमध्ये लखनौच्या संघाने ४४ धावा केल्या होत्या. त्यानंतर ७.२ षटकांत त्यांनी आपले अर्धशतक फलकावर लावले. डीकॉक यावेळी आक्रमकपणे खेळत असल्याचे पाहायला मिळाले आणि त्याने ३६ चेंडूंत आपले अर्धशतक साकारले. अर्धशतक साकारताना त्याच्या खात्यामध्ये चार चौकार आणि दोन षटकार होते. त्यानंतर लखनौच्या संघाने ७७ चेंडूंमध्ये आपले शतक फलकावर लावले. डीकॉक पाठोपाठ यावेळी राहुलनेही अर्धशतक पूर्ण केले. राहुलला अर्धशतक पूर्ण करण्यासाठी यावेळी ४१ चेंडू लागले, यामध्ये दोन चौकार आणि तीन षटकारांचा समावेश होता.