मुंबईसाठी आकाश ठेंगणे... आरसीबीने बाकावर बसवलं पण MI कडून खेळला आणि इतिहास रचला

चेन्नई : आकाश मढवाल हा मुंबईसाठी खऱ्या अर्थाने नायक ठरला. कारण आकाशने यावेळी ३.३ षटकांमध्ये फक्त पाच धावा दिल्या आणि लखनौच्या पाच फलंदाजांना बाद केले. पण आहा आकाश मुंबईच्या संघात कसा आला आणि त्याला मुंबईने किती कमी किंमतीमध्ये संघात दाखल करून घेतले, याची माहिती आता समोर आली आहे.

आकाशला खरं तर आरसीबीच्या संघाने शोधून काढले होते. आरसीबीने त्याच्यावर मेहनत घेतली खरी, पण त्याला संधी दिली नाही. पण मुंबई इंडियन्सच्या संघाने त्याच्यातील गुण हेरले आणि त्याला संधी दिली. आकाश मढवालचा गेल्या वर्षी मुंबई इंडियन्समध्ये समावेश करण्यात आला होता. त्याला सूर्याच्या जागी संघात संधी देण्यात आली होती. हॅमस्ट्रिंगच्या ताणामुळे काही सामन्यांतून तो बोहेर पडला होता. आकाशने यंदा आयपीएलमध्ये पंजाब किंग्जविरुद्ध मुंबईकडून पदार्पण केले. या सामन्यातील डेथ ओव्हरमध्येही त्याने अशीच भन्नाट कामगिरी केली होती. आकाशने पहिल्याच षटकात १६ धावा दिल्या. यानंतर कर्णधार रोहितने त्याला डेथ ओव्हरमध्ये गोलंदाजी करण्याची संधी दिली. आकाशने १८व्या षटकात १२ आणि २०व्या षटकात ९ धावा दिल्या. लखनौच्या या सामन्यात तर त्याने कमालच केली. कारण आकाशची ही कामगिरी स्वप्नवत अशीच ठरली. पहिल्या तीन षटकांमध्ये तर त्याने फक्त पाच धावांत पाच बळी मिळवले होते. त्यामुळे मुंबईच्य़ा विजयात त्याने सर्वात मोठा वाटा उचलला होता. पण आकाश हा स्थानिक क्रिकेट खेळून इथपर्यंत पोहोचला आहे. आकाशने यावेळी मोठा पराक्रम केला आहे. कारण आयपीएलच्या इतिहासात पाच धावांत पाच बळी मिळवणारा तो एकमेव क्रिकेटपटू ठरला आहे.

आकाशसाठी मुंबईने जास्त काही पैसे मोजले नाहीत. मुंबईने लिलावात त्याला फक्त २० लाख रुपये मोजले आणि संघात घेतले. त्यानंतर झहीर खानने त्याच्यावर चांगलीच मेहनत घेतली. आकाशची सर्वात महत्वाची गोष्ट म्हणजे तो लवकर शिकतो. ही गोष्ट आकाशला आता इथपर्यंत घेऊन आली आहे. त्यामुळे आता आकाश यापुढे कशी कामगिरी करतो, याकडे सर्वांचे लक्ष लागलेले असेल.

आकाशने उत्तराखंडकडून खेळताना दमदार कामगिरी केली आणि त्यामुळेच त्याला आयपीएलमध्ये खेळण्याची संधी मिळाली.