चेन्नईला एकटा भिडणारा कोण आहे हा गुजरातचा साई सुदर्शन, जाणून घ्या संपूर्ण माहिती...

अहमदाबाद : आयपीएलच्या फायनलमध्ये चेन्नईच्या संघाला एकटा नडला तो गुजरात टायटन्सचा साई सुदर्शन. शुभमन गिलला या सामन्यात मोठी खेळी साकारता आली नाही पण साईने त्याची जागा चांगलीच चालवली. कारण साईने यावेळी तुफानी फटकेबाजी केली आणि गुजरातला धावांचा डोंगर उभारून देण्यात सिंहाचा वाटा उचलला.

साई सुदर्शनचा जन्म १५ ऑक्टोबर २००१ रोजी झाला. तो तामिळनाडूमधील स्थायिक आहे. साईच्या कुटुंबाला सुरुवातीपासूनच क्रीडा क्षेत्रात खूप रस होता. त्याचे वडील अॅथलीट होते. ढाका येथे झालेल्या दक्षिण आशियाई क्रीडा स्पर्धेतही त्यांनी भारताचे प्रतिनिधित्व केले होते. याशिवाय त्याची आई राज्यस्तरीय व्हॉलीबॉलपटू राहिली आहे. आता स्वतः साईने दिल्ली कॅपिटल्सविरुद्ध जबरदस्त इनिंग खेळून आपल्या कुटुंबाचा अभिमान वाढवला आहे. सुदर्शनने ४८ चेंडूत ६२ धावांची नाबाद खेळी खेळली, ज्यात त्याच्या बॅटमधून ४ चौकार आणि २ दणदणीत षटकारही पाहायला मिळाले. त्याच्या या खेळीमुळे त्याला सामन्यानंतर सामनावीराचा किताबही मिळाला.साईने २०२१ साली सय्यद मुश्ताक अली ट्रॉफीमध्ये तामिळनाडूसाठी पदार्पण केले. त्याच वर्षी ८ डिसेंबर रोजी, त्याने तामिळनाडूकडून खेळताना आपल्या लिस्ट ए करिअरमध्ये पदार्पण केले. आयपीएल २०२२ च्या मेगा लिलावात, साई सुदर्शनला गुजरात टायटन्सने अवघ्या २० लाख रुपयांमध्ये संघात सामील केले होते. त्याने गेल्या वर्षी ८ एप्रिल रोजी मुंबईच्या ब्रेबॉर्न स्टेडियमवर पंजाब किंग्जविरुद्ध आयपीएलमध्ये पदार्पण केले होते. सुदर्शनने आतापर्यंत आयपीएलमध्ये ७ सामने खेळले असून त्यात त्याने ४५.८ च्या चांगल्या सरासरीने २२९ धावा केल्या आहेत. त्याच्या छोट्या आयपीएल कारकिर्दीत त्याने २ अर्धशतकेही झळकावली आहेत. पण या सामन्यात त्याने जी ९६ धावांची खेळी साकारली त्याला तोडच नव्हती. साईचे शतक यावेळी फक्त चार धावांनी हुकले. पण त्याने साकारलेली ही खेळी कोणीही विसरू शकत नाही. आयपीएलच्या फायनलमध्ये त्याने ही धडाकेबाज कामगिरी केली होती.

साई सुदर्शनने या सामन्यात फक्त ४७ चेंडूंत आठ चौकार आणि सहा षटकारांच्या जोरावर ९६ धावांची खेळी साकारली.