आयपीएल होणारच... आता इंग्लंडने सुचवला सर्वोत्तम पर्याय

करोना व्हायरसमुळे यंदाच्या वर्षी आयपीएल होणार की नाही, याबद्दल संभ्रम निर्माण झाला होता. पण आता आयपीएल होण्याच्या मार्गावर आहे. कारण आयपीएल आयोजित करण्यासाठी आता दोन देशांनी कंबर कसल्याचे आता पुढे आले आहे. इंग्लंडच्या क्रिकेट मंडळानेही आता आयपीएलच्या आयोजनाबाबत वक्तव्य केले आहे.

आयपीएल जर भारतात होणार नसेल तर त्यासाठी दोन देशांनी प्रस्ताव पाठवला होता. श्रीलंका आणि संयुक्त अरब अमिराती यांनी बीसीसीआयला आयपीएल आयोजित करण्याबाबत प्रस्ताव दिला होता. पण गेल्या काही दिवसांमध्ये श्रीलंकेमध्ये करोना बाधितांची संख्या वाढत असल्याचे बीसीसीआयच्या निदर्शनास आले आहे. त्यामुळे आता श्रीलंकेमध्ये आयपीएल होईल, असे सध्याच्या घडीला तरी वाटत नाही. दुसरीकडे संयुक्त अरब अमिरातीने दुबईमध्ये आयपीएल खेळवली जाऊ शकते, असे सांगितले होते आणि ते आपल्या वक्तव्यावर ठाम आहेत.

यापूर्वी २००९ साली दक्षिण आफ्रिकेत आयपीएल खेळवण्यात आली होती. त्यानंतर २०१४ साली संयुक्त अरब अमिरातीमध्ये आयपीएल खेळवण्यात आली होती. त्यामुळे आयपीएल आयोजित करण्याचा अनुभव दुबईला आहे. त्याचबरोबर आयसीसीचे मुख्यालही दुबईमध्ये आहे. त्यामुळे सध्याच्या घडीला जर भारतामध्ये आयपीएल होऊ शकत नसेल तर त्यासाठी दुबई हा सर्वात चांगला पर्याय असल्याचे समोर आले आहे.


संयुक्त अरब अमिरातीच्या क्रिकेट मंडळाचे सल्लागार शुभम अहमद यांनी सांगितले की, " आम्हाला आयपीएल आयोजित करण्याचा चांगलाच अनुभव आहे. जर आयपीएल भारतामध्ये आयोजित करणे शक्य होत नसेल तर दुबई हा त्यासाठई एक चांगला पर्याय ठरू शकतो. ऑक्टोबर-नोव्हेंबर या महिन्यात दुबईतील वातावरणही क्रिकेटला पोषक असते. त्यामुळे दुबई हा आयपीएलसाठी सर्वोत्तम पर्याय ठरू शकतो."

करोना व्हायरसमुळे भारतात आयपीएल होईल की नाही, हे आता सांगता येऊ शकत नाही. पण संयुक्त अरब अमिराती हा आयपीएलसाठी चांगला पर्याय असेल, असे इंग्लंडच्या क्रिकेट मंडळानेही स्पष्ट केले आहे. त्यामुळे आता आयपीएल भरवण्यासाठी संयुक्त अरब अमिरातीला इंग्लंडचा पाठिंबा मिळाला आहे.